Հայաստանի եւ Ատրպէյճանի միջեւ բանակցութիւնները կը շարունակուին, ուր Հայաստանը ունի իր օրակարգը։
Լրագրողներու հետ ճեպազրույցի ժամանակ այս մասին ըսաւ տնտեսութեան նախարար Գէորգ Պապոյեանը՝ անդրադառնալով այն հարցին, թէ ո՞րն է Ատրպէյճանի նպատակը հայ-ատրպէյճանական բանակցութիւններուն մէջ եւ արդեօք Հայաստանը պիտի երթա՞յ զիջումներու, քանի որ Ատրպէյճանը կը շարունակէ նոր պահանջներ դնել եւ կը պարտադրէ խաղի իր կանոնները։
«Մենք մեր օրակարգը ունինք, եւ բանակցութիւնները կը շարունակուին: ԱԳՆ-ի վերջին յայտարարութիւնը կարդացի, որ այն մասին էր, որ մեր օրակարգի կարեւոր կէտերէն մէկը երկկողմանի ընդունուած է։ Կը կարծեմ՝ սա շատ կարեւոր կէտ է բանակցութիւններու շարունակութեան համար»,- ըսաւ ան:
Անդրադառնալով Ատրպէյճանի պահանջով Հայաստանի Հանրապետութեան Սահմանադրութիւնը փոխելու վերաբերեալ հարցին՝ նախարարը ըսաւ, որ Հայաստանը իր Սահմանադրութիւնը կրնայ փոխել, երբ ՀՀ քաղաքացիները այդպէս կ’որոշեն:
«Որեւէ երկրի պահանջով Հայաստանը իր Սահմանադրութիւնը պիտի չփոխէ։ Հայաստանը իր Սահմանադրութիւնը կը փոխէ, թէ չի փոխեր, ատիկա Հայաստանի Հանրապետութեան ներքին գործն է եւ Հայաստանի Հանրապետութեան քաղաքացիներուն, ժողովուրդին, սահմանադիրին որոշելիքը»,- եզրափակեց Պապոյեանը։
