Կիրանցի մէջ Հայաստանի եւ Ատրպէյճանի սահմանապահներուն միջեւ վէճ չէ եղած։ Այս մասին յայտնեցին Հայաստանի ազգային անվտանգութեան ծառայութենէն։
Աւելի վաղ ընկերային ցանցերուն մէջ տեղեկութիւններ տարածուած էին, որ Հայաստանի եւ Ատրպէյճանի սահմանապահներուն միջեւ քանի մը անգամ վէճեր ծագած են Կիրանց գիւղին մէջ նոր սահմանին վերաբերեալ: Ըստ որոշ աղբիւրներու, Ատրպէյճանի պետական սահմանապահ ծառայութեան աշխատակիցները կը պնդեն, որ նոր ճանապարհը, իբր, մասամբ կ’անցնի նաեւ ատրպէյճանական տարածքով (ԽՍՀՄ Զինուած ուժերու գլխաւոր շտաբի քարտէզներով) ։
«Կիրանցի հատուածին մէջ նոր ճանապարհի երթուղիի հետ կապուած ՀՀ ԱԱԾ սահմանապահ զօրքերու եւ Ատրպէյճանի սահմանապահներուն միջեւ վիճաբանութիւններ տեղի չեն ունեցած։ Տաւուշի մարզի Կիրանցի հատուածին մէջ սահմանազատումէն յետոյ նոր ճանապարհի կառուցման վերաբերեալ Ատրպէյճանի Հանրապետութեան կողմէ անհամաձայնութիւն յայտնելու մասին տեղեկութիւններ ԱԱԾ-ի մօտ չկան»,- նշած է Ծառայութիւնը։
Տարածքային կառավարման եւ ենթակառուցուածքներու նախարարութենէն ալ յայտնած են, որ նոր ճանապարհի շինարարութիւնը սկսած է արդէն սահմանազատման աշխատանքներէն յետոյ։
«Կիրանցի կամուրջը շրջանցող նոր ճանապարհի երթուղին կ’անցնի Հայաստանի Հանրապետութեան ինքնիշխան տարածքով։ Կառուցուող ճանապարհի երթուղի փոփոխութիւն նախատեսուած չէ»,- յայտնած են նախարարութենէն։
