Իսրայէլի արտաքին գործերու նախարար Իսրայէլ Քաց որոշեց չեղարկել Պաղեստինեան իշխանութեան մօտ նորվեկիացի ներկայացուցիչներուն տրուած դիւանագիտական կարգավիճակը: Իսրայէլեան իշխանութիւնները խափանեցին նաեւ պաղեստինեան տուրքերը Նորվեկիոյ միջոցաւ իշխանութեան փոխանցելու համաձայնութիւնը: Նշեալ տուրքերուն ամսական միջին գումարը կը հասնի շուրջ 220 միլիոն տոլարի: Իսկ Պաղեստինեան իշխանութիւնը նշեալ գումարով կը վճարէ պետական պաշտօնեաներուն աշխատավարձերը եւ կառավարական հաստատութիւններու այլ ծախսեր:
Օսլօ հակադարձեց իսրայէլեան քայլին եւ Արտաքին գործերու նախարարութեան միջոցաւ յայտարարեց, թէ իսրայէլեան որոշումը ծայրայեղական քայլ է եւ պիտի ունենայ ծանր հետեւանքներ: «Նորվեկիա պիտի մնայ Իսրայէլին ու իսրայէլացիներուն բարեկամը, սակայն պիտի շարունակէ յստակօրէն քննադատել Կազայի պատերազմն ու քաղաքացիներուն անոր պատճառած տառապանքը», յայտնեց նախարար Էսփըն Պարթ Էյտէ: Նշենք, որ անցնող ամիսներուն Նորվեկիա, Իրլանտա, Սպանիա եւ Սլովենիա պաշտօնապէս ճանչցան Պաղեստինի պետութիւնը, նման որոշում կայացնող պետութիւններուն թիւը բարձրացնելով 148-ի:
