«Հայերս կը սիրենք հանգստանալ ջրային տարածքներու մօտ: Հիմա մեծ ընտրութեան եւ հնարաւորութիւններու պարագային ծովափնեայ երկիրներու մէջ հանգիստի կազմակերպումը աւելի հասանելի ու պահանջուած է: Առաւել եւս, որ Հայաստանէն ուղիղ թռիչքներ կ’իրականացուին տարբեր ուղղութիւններով, այդ շարքին՝ միանգամայն էքզոթիք երկիրներ: Քիչ չեն նաեւ պատմամշակութային, ճանաչողական եւ այլ տեսակի ուղեւորությունները»,- ըսաւ Զբօսաշրջութեան հայկական ֆետերասիոնի նախագահ Մեխակ Ապրեսեանը:
Հայաստանի բնակիչները ամռան կը նախընտրեն հանգստանալ ծովափնեայ երկիրներու մէջ:
Մեխակ Ապրեսեանի տեղեկացմամբ՝ հայաստանցիները աւելի յաճախ հանգիստի կը մեկնին Եգիպտոս, Չեռնոկորիա, վիզայի առկայութեան պարագային՝ նաեւ Յունաստան: Նախընտրելի ուղղութիւններրն են նաեւ Սրի Լանքան եւ եւրոպական շարք մը երկիրները, ուր նոյնպէս հնարաւոր է վայելել ծովային հանգիստը: Հայ զբօսաշրջիկներու կարելի է հանդիպիլ նոյնիկ Տոմինիքեան Հանրապետութեան մէջ, Քարիպեան աւազանի եւ Հարաւարեւելեան Ասիոյ կղզիներուն մէջ: Ամենահեռաւոր եւ էքզոթիք հանգստավայրերու մէջ մեր հայրենակիցները շատ չեն:
Հանգիստի տարածուած ուղղութիւններէն է, բնականաբար, Վրաստանի սեւծովեան ափը, սակայն, Մեխակ Ապրեսեանի խօսքով՝ այլընտրանքի ընդլայնման պայմաններուն մէջ հարեւան երկիր հանգիստի մեկնող ՀՀ քաղաքացիներուն թիւը նախորդ տարիներուն համեմատ որոշ չափով նուազած է:
Մեխակ Ապրեսեանը նաեւ տեղեկացուց, որ երբեմնի ժողովրդական Անթալիա մեկնողներ գրեթէ չկան: «Եթէ նոյնիսկ կան գացողներ, ապա շատ քիչ են: Անկեղծ ըսած՝ չեմ ալ նկատած, որ մեր զբօսաշրջային ընկերութիւնները հիմա գովազդեն այդ ուղղութիւնը: Գրաւիչ չէ նաեւ Ռուսաստանի սեւծովեան ափը»,- ընդգծեց ան:
Մեխակ Ապրեսեանի խօսքով, զբօսաշրջային ոլորտին մէջ բաւականին յաջող համագործակցութիւն ձեւաւորուած է Ռուսաստանի այլ տարածաշրջաններու հետ. «օրինակ, ունինք ուղիղ թռիչքներ դէպի Եքաթերինպուրկ, Թիւմէն եւ այլ քաղաքներ: Ատիկա զբօսաշրջութեան բնագաւառին մէջ աշխոյժ համագործակցութեան արդիւնք է: Նոյն Թիւմէնի պարագային անոր մեծապէս նպաստած եւ աջակցած է տեղի հայ համայնքը»,- ընդգծեց Ապրեսեան:
Վերջին տարիներու իրադարձութիւններէն յետոյ, նաեւ տարածաշրջանին մէջ անկայուն իրավիճակով պայմանաւորուած՝ զգալիօրէն նուազած է Արեւմտեան Հայաստան մեկնողներու թիւը, նշեց Զբօսաշրջութեան հայկական ֆետերասիոնի նախագահը:
«Այս ոլորտը Հայաստանի մէջ զարգացման նոր խթան պիտի ստանայ, եթէ ՀՀ քաղաքացիներուն հնարաւորութիւն ընձեռուի մեղմ ընթացակարգով ստանալու եւրոպական երկիրներու վիզաներ եւ այնտեղ մեկնելու հնարաւորութիւնը պարզեցուին: Հիմա զբօսաշրջային եղանակին եւրոպական երկիրներէն առանց վիզայի հնարաւոր է այցելել Չեռնոկորիա»,- եզրափակեց Մեխակ Ապրեսեանը:
