Թուրքիան ստիպուած պիտի ըլլայ գործ ունենալ Ուաշինկթընի հակաքայլերու հետ, եթէ Անքարան շարունակէ Ռուսիա արտահանել պատժամիջոցներու տակ յայտնուած ապրանքներ՝ կապուած ռազմական սարքաւորումներու հետ: Այս մասին «Financial Times»-ին յայտնած է ԱՄՆ առեւտուրի նախարարի օգնական Մեթիու Աքսելրոտը:
«Հարկաւոր է, որ Թուրքիան դադրեցնէ ԱՄՆ-ի արհեստագիտութիւններու անօրինական փոխանցումը Ռուսիոյ: Մեզի այս հարցով յառաջընթաց պէտք է թրքական իշխանութիւններուն եւ արդիւնաբերութեան կողմէ եւ արագ, կամ մենք այլ ելք չենք ունենար, քան ստիպել անոնց, որոնք կը շրջանցեն մեր արտահանման հսկողութեան միջոցները, բախիլ հետեւանքներու»,- ըսած է ան:
«Financial Times»-ը կը յիշեցնէ, որ Աքսելրոտը Սթամպուլի եւ Անքարայի մէջ թուրք պաշտօնեաներուն հետ վերջերս բանակցութիւններ վարած է այս խնդիրին շուրջ։
«Financial Times»-ի տուեալներով՝ Թուրքիոյ եւ Ռուսիոյ միջեւ առեւտրային յարաբերութիւններու պատճառով ԱՄՆ-ն աւելի վաղ 18 թրքական ընկերութիւն աւելցուցած է յատուկ ցուցակին մէջ. ամերիկեան ընկերութիւնները պէտք է յատուկ արտօնագրեր ստանան այդ ընկերութիւններուն շարք մը տեսակներու ապրանքներ վաճառելու համար: Բացի անկէ, ամերիկեան վարչակազմը քանիցս պատժամիջոցներ սահմանած է թրքական ընկերութիւններու դէմ՝ ռուսական պաշտպանական արդիւնաբերական համալիրին աջակցելու մեղադրանքով։
