Փարիզի դատախազութիւնը հետաքննութիւն սկսած է այն բանէն յետոյ, երբ Ֆրանսայի արագընթաց գնացքներուն ցանցը Ողիմպիական խաղերու բացումէն ժամեր առաջ լայնածաւալ սապոթաժի ենթարկուած էր՝ խոչընդոտելով հարիւր հազարաւոր մարդոց տեղաշարժը։
«France24» պարբերականը կը յայտնէ, որ Ֆրանսայի անվտանգութեան ուժերը կը փորձեն գտնել տեղի ունեցած յարձակումներուն մեղաւորները։
«Մեր հետախուզական ծառայութիւնները եւ իրաւապահ մարմինները զօրաշարժի ենթարկուած են՝ գտնելու եւ պատժելու այս յանցաւոր գործողութիւններու հեղինակները»,- գրած է Ֆրանսայի վարչապետ Կապրիէլ Աթալը X ընկերային հարթակով՝ անուանելով յարձակումները «նախապատրաստուած եւ համակարգուած սապոթաժի գործողութիւններ», որոնք «հսկայական եւ լուրջ հետեւանքներ» ունեցած են երկաթուղային ցանցի համար։
Փարիզի դատախազութիւնը հետաքննութիւն սկսած է «հիմնարար ազգային շահերը» խաթարելուն ուղղուած գործողութիւններուն փաստով՝ նշելով, որ այս յանցագործութեան համար կը սպառնայ մինչեւ 20 տարուայ բանտարկութիւն։
Դատախազութիւնը պիտի հետաքննէ ենթադրաբար կազմակերպուած խումբին կողմէ պատճառուած վնասը եւ տուեալներու մշակման ինքնաշխատ համակարգի վրայ յարձակումները։
Փարիզի մէջ Ողիմպիական խաղերու բացման արարողութենէն ժամեր առաջ Ֆրանսայի արագընթաց երկաթուղային ցանցը կաթուածահար եղած է՝ ազդելով մօտ 800.000 ուղեւորի վրայ։
