Ֆրանսայի մայրաքաղաք Փարիզի մէջ` Հայկական բարեգործական ընդհանուր միութեան պատկանող տան մէջ (118 Rue, Courcelles 75017, Paris հասցեում) բացուեցաւ «Հայաստանի տունը»:
Բացման արարողութեան ներկայ էին ՀՀ նախագահ Վահագն Խաչատուրեանը, ՀՀ վարչապետի աշխատակազմի ղեկավար Արայիկ Յարութիւնեանը, ՀՀ ԿԳՄՄ նախարարի տեղակալ Կարէն Գիլոյեանը, Ֆրանսայի մէջ ՀՀ դեսպան Յասմիկ Տոլմաճեանը եւ Հայաստանի ողիմպիական հաւաքականի շարք մը անդամներ եւ պատուիրակութեան ղեկավար կազմը:
«Բոլորիս ակնկալիքն ու ցանկութիւնը մէկն է` տեսնել Հայաստանի դրօշը բարձրացած, ուրախ ժպիտներով, յաղթանակած տեսնել ձեզ: Մենք եկած ենք նաեւ այդ ակնկալիքով: ՀՀ գործող իշխանութիւնը առանձնայատուկ ուշադրութիւն կը դարձնէ ֆիզիքական դաստիարակութեան: Սա միայն խօսքեր չեն: Վարչապետը իր օրինակով ցոյց կու տայ, որ մարմնամարզն ու առողջ ապրելակերպը բոլորիս անհրաժեշտ է»,- ըսաւ ՀՀ նախագահ Վահագն Խաչատուրեանը:
ՀՀ վարչապետի աշխատակազմի ղեկավար Արայիկ Յարութիւնեանը, յաջողութիւն մաղթելով Հայաստանի ողիմպիական հաւաքականի ներկայացուցիչներուն, ըսաւ. «Յոյս ունիմ, որ մինչեւ ամսուն 11 մենք բազմաթիւ հնարաւորութիւններ պիտի ունենանք այս տան մէջ պատուելու մեր մարզիկները: Կ՛ուզեմ յոյս յայտնել, որ ամսուն 11-էն յետոյ մենք կը խոստանանք չորս նոր դպրոց բանալու մեր ողիմպիականներու պատուին: Վերջին տարիներուն պետութիւնը շատ մեծ յանձնառութիւն վերցուցած է առաւելագոյնս սատարելու մեր մարզիկներուն»:
ՀՀ ԿԳՄՄ նախարարի տեղակալ Կարէն Գիլոյեանը «Հայաստանի տունը» կը համարէ հայկականութեան կեդրոն Փարիզի մէջ այս օրերուն, երբ ամբողջ մադզական աշխարհը կեդրոնացած է Ֆրանսայի մայրաքաղաքին վրայ:
«Հայաստանի տան» մէջ պիտի հանդիպին մարդիկ, որոնք պիտի ուզեն հայանալ, աւելի շատ հայ դառնալ, հայութիւն շնչել: Անոնք պիտի գան այստեղ, ուր պիտի հետեւին նաեւ մեր մարզիկներու ելոյթներուն: Ողիմպիական խաղերու ժամանակ շատ երկիրներ այսպիսի նախագիծեր կ՛իրականացնեն: Մեր նպատակը երկրպագու-մարզիկ, մարզիկ-լրագրողներ կապը ամրացնելն է»,- ըսաւ Գիլոյեանը:
«Հայաստանի տան» դէմքը ֆութպոլի աշխարհի առաջնութեան ախոյեան Եուրի Ճորքայեֆն է:
Հայաստանը Փարիզի 33-րդ ամառնային Ողիմպիական խաղերուն պիտի ունենայ 15 մասնակից` հրաձիգ Էլմիրա Կարապետեանը, մարմնամարզիկներ Արթուր Դաւթեանը (յենացատկ), Վահագն Դաւթեանը (օղակներ), ըմբիշներ Սլաւիկ Գալստեանը (յունահռոմէական ոճ, 67 քկ), Մալխաս Ամոյեանը (յունահռոմէական ոճ, 77 քկ), Արթուր Ալեքսանեանը (յունահռոմէական ոճ, 97 քկ), Արսէն Յարութիւնեանը (ազատ ոճ, 57 քկ), Վազգէն Թեւանեանը (ազատ ոճ, 65 քկ), ծանրորդներ Անդրանիկ Կարապետեանը (89 քկ), Գարիկ Կարապետեանը (102 քկ), Վարազդատ Լալայեանը (+102 քկ), բռնցքամարտիկ Դաւիթ Չալոյեանը (+92 քկ), լողորդներ Արթուր Բարսեղեանը եւ Վարսենիկ Մանուչարեանը, աթլեթ Երուանդ Մկրտչեանը:
Ստորեւ կը ներկայացնենք Ողիմպիական խաղերուն հայ մարզիկներու ժամանակացոյցը.
Յուլիս 27-ին` Էլմիրա Կարապետեան. հրաձգութեան որակաւորման փուլ. Յուլիս 28-ին` եզրափակիչ:
Յուլիս 27-ին` Արթուր Դաւթեան, Վահագն Դաւթեան. մարմնամարզութեան յենացատկի եւ օղակներու վարժութիւններու որակաւորման փուլ:
Յուլիս 27-ին` Վարսենիկ Մանուչարեան. լողի որակաւորման փուլ եւ եզրափակիչ:
Յուլիս 29-ին` Դաւիթ Չալոյեան. բռնցքամարտի որակաւորման փուլի մեկնարկ:
Յուլիս 30-ին` Արթուր Բարսեղեան. լողի որակաւորման փուլ եւ եզրափակիչ:
Օգոստոս 4-ին` Արթուր Դաւթեան, Վահագն Դաւթեանը. մարմնամարզութեան եզրափակիչներ:
Օգոստոս 6-ին` Մալխաս Ամոյեան, Արթուր Ալեքսանեան. ըմբշամարտի մեկնարկային գօտեմարտեր, եզրափակիչը` Օգոստոս 7-ին:
Օգոստոս 7-ին` Երուանդ Մկրտչեան. աթլեթիքի 800 մեթր վազքի որակաւորում:
Օգոստոս 7-ին` Սլաւիկ Գալստեան. ըմբշամարտի մեկնարկային գօտեմարտեր, եզրափակիչը` Օգոստոս 8-ին:
Օգոստոս 8-ին` Արսէն Յարութիւնեան. ըմբշամարտի մեկնարկային գօտեմարտեր, եզրափակիչը` Օգոստոս 9-ին:
Օգոստոս 9-ին` Անդրանիկ Կարապետեան. ծանրամարտի մրցաշարք:
Օգոստոս 10-ին` Գարիկ Կարապետեան, Վարազդատ Լալայեան. ծանրամարտի մրցաշարքեր:
Օգոստոս 10-ին` Վազգէն Թեւանեան, ըմբշամարտի մեկնարկային գօտեմարտերը, եզրափակիչը` Օգոստոս 11-ին:
