ՀՀ արտաքին գործերու նախարար Արարատ Միրզոյեան ընդունած է ԱՄՆ ծերակուտական Ռոճըր Ուիքըրի գլխաւորած գոնկրէսական պատուիրակութիւնը։
Զրուցակիցները քննարկած են ՀՀ-ԱՄՆ քաղաքական երկխօսութեան օրակարգային, ինչպէս նաեւ տարածաշրջանային զարգացումներուն առնչուող հարցեր:
ՀՀ արտաքին գործերու նախարարը ընդգծած է. «Վերջին շրջանին ԱՄՆ-ի հետ մենք ձեւաւորած ենք աշխոյժ երկխօսութիւն տարբեր մակարդակներու վրայ, եւ շատ կարեւոր է, որ մօտ մէկ ամիս առաջ կայացուցինք համատեղ որոշում՝ բարձրացնել մեր համագործակցութեան մակարդակը ռազմավարական գործընկերութեան»:
Արարատ Միրզոյեան յաւելած է, որ ՀՀ-ԱՄՆ համագործակցութեան զարգացումը միտուած է նաեւ ՀՀ դիմակայունութեան ամրապնդման, ինչ որ հայկական կողմը բարձր կը գնահատէ:
Հանդիպման ընթացքին անդրադարձ կատարուած է Հայաստանի մէջ ժողովրդավարական բարեփոխումներու ընթացքին եւ արձանագրուած նշանակալի յառաջընթացին, ինչպէս նաեւ ներկայիս աշխարհաքաղաքական զարգացումներու պայմաններուն մէջ ժողովրդավարական զարգացման ճանապարհին հանդիպող շարունակական մարտահրաւէրներուն:
Քննարկուած են նաեւ տարածաշրջանային անվտանգութեան հարցեր: ՀՀ արտաքին գործերու նախարարը ներկայացուցած է Հարաւային Կովկասի մէջ կայունութեան ու երկարատեւ խաղաղութեան հաստատման ՀՀ տեսլականը, այդ շարքին՝ հարեւաններու հետ յարաբերութիւններու կարգաւորման մասով: Ատրպէյճանի հետ ընթացող գործընթացներու ծիրին մէջ, Արարատ Միրզոյեան ընդգծած է 1991թ. Ալմա-աթայի հռչակագրի հիման վրայ սահմանազատման գործընթացի շարունակականութեան ապահովման եւ բանակցուած խաղաղութեան պայմանագրի ստորագրման կարեւորութիւնը:
Անդրադարձ կատարուած է նաեւ տարածաշրջանային կապուղիներու ապաշրջափակման, ինչպէս նաեւ մարդասիրական բնոյթի հարցերու:
ՀՀ արտաքին գործերու նախարարը եւ ԱՄՆ խորհրդարանականները միտքեր փոխանակած են Հայաստանի արտաքին քաղաքականութեան եւ փոխադարձ հետաքրքրութիւն ներկայացնող այլ հարցերու շուրջ:
