Ուրուկուէյի ամենահեղինակաւոր համերգասրահին՝ Սոլիս թատրոնին մէջ, տեղի ունեցած է աշխարհահռչակ հայ երաժշտահան Արամ Խաչատրեանի 120-ամեակին նուիրուած համերգ:
Բացառիկ համերգի շրջանակներուն մէջ ՀՀ դեսպանութիւնը՝ Արամ Խաչատրեանի տուն-թանգարանին հետ համագործակցութեամբ, Սոլիս թատրոնին մէջ ներկայացուցած է նաեւ Արամ Խաչատրեանի՝ 1957 թուականին Ուրուկուէյ կատարած այցի լուսանկարներու ցուցահանդէս:
Տուն-թանգարանի բարեկամ, Ուրուկուէյի «Ռատիօ Արաքս»-ի տնօրէն Տիեկօ Գարամանուկեանի ջանքերով Արամ Խաչատրեանի 120-ամեայ յոբելեանին առիթով հրատարակուած անգլիալեզու պատկերագիրքը յանձնուած է Ուրուկուէյի մէջ ՀՀ դեսպան Մարիամ Գէորգեանին եւ Մոնթեվիտէոյի ֆիլհարմոնիային:
ՀՀ կրթութեան, գիտութեան, մշակոյթի եւ մարմնամարզի նախարարութեան աջակցութեամբ կայացած այս համերգի ընթացքին ՀՀ վաստակաւոր արուեստագէտ, անուանի դաշնակահար Հայկ Մելիքեանը՝ Մոնթեվիտէոյի ֆիլհարմոնիկ նուագախումբին հետ եւ խմբավար Ալվարօ Յակոբեանի ղեկավարութեամբ, ներկայացուցած է Արամ Խաչատրեանի հանրայայտ դաշնամուրային համանուագը: Երեկոյի ընթացքին Մոնթեվիտէոյի ֆիլհարմոնիկ նուագախումբին կատարմամբ հնչած են նաեւ Արամ Խաչատրեանի հանրայայտ այլ ստեղծագործութիւններ, այդ շարքին՝ «Դիմակահանդէս»-ի վալսը, «Զանգեզուրի քայլերգը», «Գայիանէ» պալետէն հատուածներ եւ այլն:
ՀՀ դեսպանութեան հրաւէրով՝ համերգին ներկայ գտնուած են նաեւ Ուրուկուէյի Արտաքին յարաբերութիւններու նախարարութեան եւ այլ պետական գերատեսչութիւններու աշխատակիցներ, երկրին մէջ հաւատարմագրուած դիւանագիտական ներկայացուցիչներ:
Համերգին հետեւած ընդունելութեան ընթացքին դեսպան Մարիամ Գէորգեանը շնորհակալագրերով պարգեւատրած է դաշնակահար Հայկ Մելիքեանը եւ խմբավար Ալվարօ Յակոբեանը՝ Արամ Խաչատրեանի երաժշտական ժառանգութիւնը Ուրուկուէյի մէջ լաւագոյնս ներկայացնելու համար:
