Հայաստանը մեծապէս կը կարեւորէ Միացեալ Նահանգներու դերը Հարաւային Կովկասի տարածաշրջանին մէջ խաղաղութեան հաստատման գործընթացին մէջ:
Այս մասին ընդգծած է ԱԺ նախագահ Ալէն Սիմոնեանը ԱՄՆ ծերակուտական Ռոճըր Ուիքըրի գլխաւորած գոնկրէսական պատուիրակութեան ընդունելութեան ընթացքին:
Նեղ կազմով տեղի ունեցած զրոյցին յաջորդած է ընդլայնուած կազմով հանդիպումը, որուն մասնակցած են նաեւ ՀՀ ԱԺ պատգամաւորներ:
Ողջունելով պատուիրակութեան ժամանումը Հայաստան՝ ՀՀ ԱԺ նախագահը շնորհակալութիւն յայտնած է ԱՄՆ-ին՝ Հայաստանի ժողովրդավարական տեսլականին շարունակական աջակցութեան համար:
«ԱՄՆ շարունակաբար աջակցած է Հայաստանի ժողովրդավարական տեսլականին եւ զգալիօրէն նպաստած է Հայաստանի մէջ ժողովրդավարական հիմնարկներու եւ օրէնքի գերակայութեան ամրապնդման ու մարդու իրաւունքներու պաշտպանութեան: Այս ծիրին մէջ մենք մեծապէս կը կարեւորենք Միացեալ Նահանգներու դերը մեր տարածաշրջանին մէջ խաղաղութեան հաստատման գործընթացին մէջ եւ բարձր կը գնահատենք ԱՄՆ-ի աջակցութիւնը Հայաստանի ինքնիշխանութեան, անկախութեան, ժողովրդավարութեան, տարածքային ամբողջականութեան եւ սահմաններու անխախտելիութեան՝ հիմնուած 1991 թուականի Ալմա-աթայի հռչակագրին վրայ»,- ըսած է Ալէն Սիմոնեան:
Քննարկումներու առանցքին եղած են խաղաղութեան պայմանագրին, հայ-թրքական յարաբերութիւններուն, Ատրպէյճանում մէջ պահուող հայ գերիներու հայրենադարձութեան եւ Լեռնային Ղարաբաղի հայկական պատմամշակութային ժառանգութեան պահպանման վերաբերող հարցերը: Ամերիկացի հիւրերուն ներկայացուած է ՀՀ կառավարութեան մշակած «Խաղաղութեան խաչմերուկ» նախագիծը:
