Հայաստանի Հանրապետութիւնը յստակօրէն յառաջ կը մղէ խաղաղութեան օրակարգը՝ փորձելով հարթել բոլոր տեսակի խնդիրները իր հարեւաններուն հետ, եւ այս գործընթացին մէջ չափազանց մեծ է եւրոպական ընտանիքին դերը։
Եւրոպայի մէջ անվտանգութեան եւ համագործակցութեան կազմակերպութեան (ԵԱՀԿ) Խորհրդարանական վեհաժողովի նստաշրջանին մէջ ունեցած ելոյթի ընթացքին ըսած է Ազգային ժողովի «Քաղաքացիական պայմանագիր» խմբակցութեան քարտուղար, ՀՀ ԱԺ պատգամաւոր Արթուր Յովհաննիսեանը:
«Անվիճելի է, որ մարդու ապրելու համար ամենայարմար միջավայրը պետութիւնն է, իսկ պաշտպանուած, ազատ ու բարեկեցիկ ապրելու միջավայրը՝ ժողովրդավար պետութիւնը, ուր ազատ ընտրութիւնը կարեւորագոյն արժէք է»,- նշած է Յովհաննիսեան՝ ափսոսանք յայտնելով, որ հիմա շատ ուղիղ ու շատ ուժգին յարձակում տեղի կ՛ունենայ ժողովրդավարութեան դէմ եւ ոչ թէ տարածքային ամբողջականութեան, կամ ալ մարդու իրաւունքներու։
Ան իր խօսքին մէջ նշած է, որ այդ յարձակումը կ՛իրականացուի ժողովրդավարութեան դէմ, որովհետեւ առանց անոր չեն կրնար պաշտպանուած ըլլալ թէ՛ տարածքային ամբողջականութիւնը, եւ թէ՛ ալ մարդու իրաւունքները։
Արթուր Յովհաննիսեանի դիտարկմամբ՝ ժողովրդավարութիւնը այսօր պաշտպանութեան կարիք ունի՝ առաւել քան երբեւէ, եւ հետեւաբար ժողովրդավար պետութիւններու համախմբումն ու համատեղ պայքարը մենատիրութեան դէմ՝ նպատակ ունի ապահովել մեր ժողովուրդներու անվտանգութեան ազատութիւնը։
«Անոր համար ալ իմ պետութիւնը՝ Հայաստանը, անշեղօրէն շարժելով ժողովրդավարութեան ճանապարհով, հաստատակամօրէն կը շարժի դէպի Եւրոմիութիւն, դէպի ժողովրդավարական արժէքներ, եւ հայ ժողովուրդը իր ազատութեան եւ անկախութեան համար մղուող ոչ-դիւրին պայքարի ընթացքին կը ձգտի եւ կ՛ակնկալէ ժողովրդավար պետութիւններու աջակցութիւնը՝ յանուն ազատութեան յաղթանակին»,- ըսած է ԱԺ պատգամաւորը՝ շեշտելով, որ Հայաստանը յստակօրէն յառաջ կը մղէ խաղաղութեան օրակարգը՝ փորձելով հարթել բոլոր տեսակի խնդիրները իր հարեւաններուն հետ։
Յովհաննիսեանը այս ծիրին մէջ եւս մէկ անգամ կարեւորած է պաշտօնական Երեւանի կողմէ տարածաշրջանի երկրներուն առաջարկուող «Խաղաղութեան խաչմերուկ» նախագիծը, որ համակեցութեան եւ խաղաղութեան մասին է։
«Այս գործընթացներին մէջ եւրոպական ընտանիքին դերը չափազանց կարեւոր է։ Հետեւաբար, չկայ ո՛չ ազատութիւն, ո՛չ ալ խաղաղութիւն առանց ժողովրդավարութեան։ Կեցցէ՛ ժողովրդավարութիւնը»,- եզրափակած է ան։
