Մոսկուան կը շարունակէ Երեւանը համարել դաշնակից, եւ երկու երկիրներուն տնտեսական համագործակցութիւնը նկատելի աճ կ’արձանագրէ: Լրագրողներու հետ զրոյցին այս մասին յայտնած է Ռուսաստանի փոխվարչապետ Ալեքսէյ Օվերչուքը։
«Մենք կը շարժինք անկէ, որ Հայաստանը մեր դաշնակիցն է։ Մենք շատ կարեւոր տնտեսական յարաբերութիւններ ունինք Հայաստանի հետ։ 7,3 միլիառ տոլար կը կազմէ Հայաստանի հետ մեր առեւտրաշրջանառութիւնը, եւ եթէ նայինք վիճակագրութեան, ապա այն կրկնապատկուած է անցեալ տարուան համեմատ։ Շարժերը շատ լաւ են, տնտեսութիւնը շատ լաւ կը զարգանայ»,- նշած է Ռուսաստանի փոխվարչապետը՝ յիշեցնելով նաեւ ԵԱՏՄ-ի մէջ Հայաստանի «աշխոյժ մասնակցութեան» մասին։
Փոխվարչապետ Օվերչուքը այդ մասին խօսած է ՆԱԹՕ-ի յոբելենական գագաթաժողովին Հայաստանի մասնակցութեան մասին հարցումին լոյսին ներքոյ:
