Վարչապետ Նիկոլ Փաշինեան ընդունած է ԱՄՆ ծերակուտական Ռոճըր Ուիքըրի գլխաւորած գոնկրէսական պատուիրակութիւնը:
Վարչապետը ողջունած է գոնկրէսականներուն այցը Հայաստան եւ գոհունակութիւն յայտնած է Հայաստան-ԱՄՆ յարաբերութիւններու յարաշարժ զարգացման բնոյթէն: Նիկոլ Փաշինեան ընդգծած է վերջերս Երեւանի մէջ տեղի ունեցած Հայաստան-ԱՄՆ ռազմավարական երկխօսութեան նիստի կայացման կարեւորութիւնը եւ համոզմունք յայտնած, որ երկկողմ համագործակցութիւնը պիտի շարունակէ զարգանալ ու ամրապնդուիլ: Վարչապետը նշած է, որ ԱՄՆ արդիւնաւէտ աջակցութիւնը կը ցուցաբերէ Հայաստանի մէջ ժողովրդավարական բարեփոխումներու յառաջմղման՝ յաւելելով, որ ՀՀ կառավարութեան համար ժողովրդավարութեան զարգացումը ունի ռազմավարական նշանակութիւն:
Զրուցակիցները կարեւորած են երկու երկիրներուն միջեւ քաղաքական, տնտեսական, ուժանիւթային եւ այլ ուղղութիւններով կապերու ընդլայնումն ու խորացումը, եւ այդ առումով ընդգծած են միջկառավարական ու միջխորհրդարանական աշխոյժ երկխօսութեան անհրաժեշտութիւնը:
Անդրադարձ կատարուած է Հայաստանի մէջ ժողովրդավարական հիմնարկներու զարգացման, փտածութեան դէմ պայքարին ուղղութեամբ ՀՀ կառավարութեան քայլերուն: Միտքեր փոխանակուած են Հայաստանի եւ Ատրպէյճանի միջեւ խաղաղութեան պայմանագրին վերաբերեալ տեղի ունեցող քննարկումներուն, ՀՀ կառավարութեան «Խաղաղութեան խաչմերուկ» նախագիծին, տարածաշրջանին մէջ տեղի ունեցող գործընթացներուն եւ երկուստեք հետաքրքրութիւն ներկայացնող այլ հարցերու շուրջ:
