Հանրօգուտ աշխատանքներու եւ փոխադրութեան հարցերու նախարարի պաշտօնակատար Ալի Համիէ մամլոյ ասուլիսի ընթացքին յայտնեց, որ յառաջիկայ շաբաթ պիտի վաճառեն Պէյրութի նաւահանգիստի տարածքին մէջ 2020-ի պայթումին հետեւանքով կուտակուած մետաղները: Ըստ Համիէի, այս նախ պիտի ըլլայ եկամուտի յաւելեալ աղբիւր, որովհետեւ մետաղները պիտի վաճառուին կշիռքի սակագինով, ապա, կարեւորագոյնը՝ հնարաւոր պիտի ըլլայ նոր ներդրումներու համար ազատել նաւահանգիստի շուրջ 150 հազար մեթր տարածք, ուր այժմ կուտակուած են մետաղները: «Տեղական եւ միջազգային ընկերութիւնները այսուհետեւ առիթ պիտի ունենան ներդրումներ կատարելու Պէյրութի նաւահանգիստին մէջ», ըսաւ Համիէ, խոստանալով շուտով կազմակերպել նաեւ նաւահանգիստի պայթումին պատճառով կործանուած շուրջ 1100 ինքնաշարժներու վաճառքի աճուրդ:
