Լիբանանի հարաւային շրջանին մէջ տիրող պատերազմական դրութիւնը եւ Իսրայէլի ու Հըզպալլայի միջեւ առճակատումի աշխարհագրական ընդարձակումը կը գրաւեն միջազգային ուժային կեդրոններու հետեւողական ուշադրութիւնը: Եւրոմիութեան արտաքին քաղաքականութեան եւ պաշտպանութեան հարցերու գերագոյն ներկայացուցիչ Ժոզեփ Պորել շեշտեց պատերազմի դէպի Լիբանան ընդարձակումը կանխելու անհրաժեշտութիւնը, յիշետնելով որ իրավիճակը արդէն խիստ լարուած է: «Նախագահ Ճօ Պայտընի առաջարկած ծրագիրը տակաւին չէ գործադրուած, ռմաբակոծումը եւ քաղաքացիները սովի մատնելու ռազմավարութիւնը կը շարունակուին, մարդասիրական օգնութիւնները մուտք չեն գործեր Կազա», բողոքեց Պորել:
Եւրոմիութենէն պաշտօնատարներու հետ Պրիւքսէլի մէջ տեսակցութիւններ ունեցաւ արտաքին գործերու նախարարի պաշտօնակատար Ապտալլա Պու Հապիպը՝ արծարծելով Հարաւի շուրջ լարուածութիւնը մեղմելու միջոցները՝ խուսափելու տարածաշրջանային բաց առճակատումէ մը: Զրուցակիցները քննարկեցին հակամարտութիւնը խաղաղ դիւանագիտական միջոցներով լուծելու կարեւորութիւնը:
Ֆրանսայի Արտաքին գործերու նախարարութիւնը կոչ ուղղեց յարգելու 1701 բանաձեւը: «Փարիզ խիստ մտահոգ է Լիբանանի մէջ տիրող ապահովական վիճակի վտանգաւորութեամբ», նշուեցաւ յայտարարութեան մէջ: Ֆրանսայի իշխանութիւնները բոլոր կողմերէն պահանջեցին դիմել ինքնազսպումի եւ յարգել 1701 բանաձեւին բոլոր յօդուածները: Լիբանանի մէջ Միացեալ Նահանգներու դեսպանութիւնը ամերիկացիներուն վերյիշեցուց, որ այս փուլին անհրաժեշտ է վերատեսութեան ենթարկել Լիբանան ճամբորդելու ծրագրերը, որովհետեւ «ապահովական դրութիւնը բարդ է եւ կրնայ արագօրէն փոխուիլ»: Ըստ դեսպանութեան, Լիբանանի կառավարութիւնը կարողութիւն չունի անակնկալ զարգացումի պարագային երաշխաւորելու ամերիկացիներուն անվտանգութիւնը: Իսկ Լիբանանի մէջ Ռուսիոյ դեսպան Ալեքսանտըր Ռոտաքով յստակացուց, որ հակառակ լրատուամիջոցներու տարածած անհիմն տեղեկութիւններուն, Մոսկուա իր քաղաքացիներուն չէ արգիլած Լիբանան ճամբորդել, ոչ ալ այդ մասին պաշտօնական հաղորդագրութիւն հրապարակած է, այլ ինքն է որ հարցազրոյցի մը մէջ ռուսերուն խորհուրդ տուած է յետաձգել ոչ-անհրաժեշտ այցելութիւնները, նկատի առնելով հարաւային զարգացումները: Ռոտաքով միաժամանակ խօսած է կացութիւնը հանդարտեցնելու փորձերուն մասին:
Իսկ Թուրքիոյ նախագահ Ռեճեպ Թայիպ Էրտողան արեւմտեան երկիրները նախօրօք ամբաստանեց Լիբանանի դէմ իսրայէլեան հաւանական գործողութեան զօրակցելու մէջ: «Կը ցաւիմ, որ ազատութեան, արդարութեան եւ մարդկային իրաւունքներու մասին խօսող պետութիւններ դարձած են Նեթանիահուի նման մտային հիւանդի մը պատանդը», ըսաւ Էրտողան եւ շրջանի բոլոր երկիրներուն կոչ ուղղեց զօրակցելու Լիբանանին:
