Միացեալ Նահանգներու պաշտպանութեան նախարար Լոյտ Օսթըն Իսրայէլի պաշտպանութեան նախարար Եոավ Կալանթի հետ գումարած ժողովէն ետք յայտարարեց, թէ կը փորձեն դիւանագիտական լուծում գտնել Լիբանանի եւ Իսրայէլի միջեւ սահմանային շրջաններու բնակչութիւնը վերադարձնելու համար իրենց բնակավայրերը: Ան զգուշացուց, թէ Հըզպալլայի եւ Իսրայէլի միջեւ պատերազմի բռնկումը պիտի ըլլայ կործանարար: Օսթըն աւելցուց, որ այսպիսի պատերազմ մը կրնայ դիւրութեամբ վերածուիլ շրջանային մեծ բախումի: Ան վերահաստատեց ԱՄՆ-ի նեցուկը Իսրայէլի պետութեան:
Իր կարգին, Իսրայէլի պաշտպանութեան նախարարը յայտարարեց, թէ պայմանաժամը որ տրուած է՝ հասնելու համար դիւանագիտական լուծումի լիբանանեան կողմին հետ, սկսած է մօտենալ իր աւարտին: Ան աւելցուց, որ պատրաստ են ամէն տեսակի լուծումի՝ փոխելու համար վիճակը հիւսիսային սահմանին վրայ:
Իսրայէլի կառավարութիւնը երկարաձգեց հիւսիսային շրջաններէն գաղթած ընտանիքներու պանդոկի մէջ մնալու պայմանաժամը մինչեւ Օգոստոս ամսուան վերջը:
