Հայաստանի Հանրապետութեան աշխատանքի եւ ընկերային հարցերու նախարար Նարեկ Մկրտչեան ընդունած է Հայաստանի մէջ ՄԱԿ մշտական համակարգող Ֆրանսուազ Ժաքոպը։ Հանդիպման ընթացքին քննարկուած են աշխատանքի եւ ընկերային պաշտպանութեան ոլորտին մէջ շարունակական համագործակցութեան, համատեղ իրականացուած ծրագրերու արդիւնքներուն, ինչպէս նաեւ գործող ծրագրերու ընթացքին առնչուող շարք մը հարցեր։
Ընդգծելով ՄԱԿ-ի կառոյցներուն հետ ունեցած ոլորտային արդիւնաւէտ համագործակցութեան դերը՝ նախարար Մկրտչեան բարձր գնահատած է վերջիններուս ներդրումը Հայաստանի մէջ իրականացուող առանցքային բարեփոխումներուն աջակցելու գործին մէջ։ Այս առումով, մասնաւորապէս, շեշտուած է համատեղ իրականացուած աշխատանքներուն կարեւորութիւնը աշխատանքի եւ զբաղուածութեան, ընկերային աջակցութեան, երեխաներու իրաւունքներու պաշտպանութեան, կանանց հիմնահարցերու եւ մարդոց թրաֆիքինկի ոլորտներուն մէջ։
«ՄԱԿ-ի կառոյցներուն հետ ունինք համագործակցութեան լայն շրջանակ, որ կ՛ընդգրկէ աշխատանքի եւ ընկերային պաշտպանութեան համակարգի գրեթէ բոլոր ոլորտները։ Ուրախ ենք եւ պատրաստակամ՝ շարունակելու համատեղ աշխատանքները ինչպէս արդէն նախանշուած, այնպէս ալ նոր ուղղութիւններով»,- նշած է նախարարը։
Անդրադառնալով ոլորտային ռազմավարություններուն՝ Նարեկ Մկրտչեան ներկայացուցած է ժողովրդագրութեան, զբաղուածութեան, ընկերային աջակցութեան ոլորտներուն մէջ սահմանուած առաջնահերթություններն ու այդ ուղղութեամբ նախատեսուող աշխատանքները։ Նախարարը նշած է, որ աշխատանքի եւ զբաղուածութեան ոլորտի գերակայութիւններուն անդրադարձ կատարուած է նաեւ օրերս Ժընեւի մէջ կայացած Աշխատանքի միջազգային համաժողովի 112-րդ նստաշրջանին, որու շրջանակին մէջ քննարկուած են նաեւ աշխատանքային իրաւունքներու խթանման, կայուն զբաղուածութեան ապահովման, արժանապատիւ աշխատանքի եւ աղքատութեան դէմ պայքարի ուղղութիւններուն առնչուող շարք մը հարցեր։
Ֆրանսուազ Ժաքոպը եւս շեշտած է նախարարութեան հետ արդիւնաւէտ համագործակցութեան կարեւորութիւնը եւ վերահաստատած է պատրաստակամութիւնը՝ ներդնելու անհրաժեշտ միջոցներ ու ջանքեր՝ ոլորտի զարգացման ուղղութեամբ։
Հանդիպման աւարտին կողմերը պատրաստակամութիւն յայտնած են գործնականին մէջ ընթացք տալու քննարկուած հարցերուն։
