ՀՀ Պաշտպանութեան նախարարութիւնը շրջանառութեան մէջ դրած է «Վարժական հաւաքներ յայտարարելու մասին» նախագիծ, որով կը նախատեսուի 2024 թուականի 15 Սեպտեմբերէն մինչեւ 15 Դեկտեմբեր պահեստազօրայիններու վարժական հաւաքներ կայացնել։ Այս մասին տեղեկութիւն տարածած է Իրաւական գործերու նախագիծերու հրապարակման միասնական կայքը:
Որոշման նախագիծին ընդունումը պայմանաւորուած է պահեստազօրի առաջին խումբին մէջ հաշուառուած շարքային, ենթասպայական եւ սպայական կազմերու պահեստազօրայիններու ռազմական հմտութիւններու կատարելագործման, վերապատրաստման եւ պատրաստման վարժական հաւաքներու կայացման անհրաժեշտութեամբ:
Վարժական հաւաքները կը յայտարարուին պահեստազօրի մէջ հաշուառուած քաղաքացիներու` 1) ռազմական ունակութիւններու կատարելագործման, 2) մասնագիտական վերապատրաստման, 3) մասնագիտական պատրաստման, 4) բարձրագոյն կրթութիւն ունեցող ենթասպայական կազմէն պահեստազօրի սպաներու պատրաստման նպատակով:
