Իսրայէլի պաշտպանութեան նախարար Եոավ Կալանթ յայտնեց, որ «Հըզպալլա պատերազմ սկսաւ, իսկ մեր պարտականութիւնն է փոխել իրավիճակը»: Իսկ Իսրայէլի մէջ Կիպրոսի դեսպանը դիտել տուաւ, որ «երբ մեզի կը սպառնայ Նասրալլայի նման անձ մը, անշուշտ պիտի հահադարձենք»:
Իսրայէլեան բանակի սպայակոյտի պետը այցելեց Լիբանանի հետ սահմանային գօտի, ուր ստուգեց զինուորական դիրքերը եւ նախապատրաստութիւնները, ապա յայտնեց, թէ «բանակը ունի ռազմական շատ մեծ հնարաւորութիւններ, իսկ մեր թշնամին ծանօթ է միայն անոր մէկ փոքր մասին»: Բանակի բանբերը, իր կարգին, վերահաստատեց, որ «զինուած ուժերը պատրաստ են բոլոր հաւանականութիւններուն», աւելցնելով որ Լիբանանի հետ որեւէ առճակատում պիտի աւարտի համաձայնութեամբ: «Մենք յանձնառու կը մնանք ահմանային բնակավայրերու բնակիչները տուն վերադարձնելու խոստումին», ըսաւ բանբերը:
Իսրայէլեան օդուժը քանի մը յարձակում գործեց Սուրի Շարպիհա եւ Պուրղուլիա շրջաններուն վրայ, որոնք թիրախաւորուած էին նաեւ նախանցեալ օր: Ըստ իսրայէլեան կողմին, նշեալ շրջանին մէջ հիմնայատակ կործանուած է Հըզպալլային կողմէ ռազմական նպատակներով գործածուող շէնք մը:
Իսրայէլեան բանակը յայտարարեց, թէ լիբանանեան հողերէն «Քաթիուշա» տիպի 10 հրթիռ արձակուած է սահմանային Քրիաթ Շեմոնա բնակավայրին ուղղութեամբ, վնասներ պատճառելով բնակավայրին արդիւնաբերական շրջանին: Հըզպալլա իր կարգին յայտարարեց, թէ հրետանիով եւ հրթիռներով թիրախաւորած է նշեալ բնակավայրին մերձակայ զօրամասը, պատճառելով նիւթական ծանր վնասներ:
Իսրայէլեան լրատուամիջոցներ երէկ տեղեկութիւններ հրապարակեցին նաեւ Հայֆայի շրջանին մէջ Հըզպալլայի իրականացուցած «Յոպոպ» գործողութեան մասին: Այնտեղ, Հըզպալլայի ուղարկած անօդաչու թռչող «Յոպոպ» տիպի լրտես սարքերը ժամերով սաւառնած եւ նկարահանումներ իրականացուցած են, խուսափելով իսրայէլեան հակաօդային պաշտպանութեան միջոցներէն: Իսրայէլեան բանակը միայն երէկ յայտարարեց Հըզպալլայի երեք սարքերու ներթափանցումին մասին:
