Հայաստանը հաւատարիմ է Ատրպէյճանի հետ յարաբերութիւններու կարգաւորման եւ պետական սահմանի սահմանազատման գործընթացին՝ հիմնուած Ալմա-աթայի հռչակագրի հիմքով տարածքային ամբողջականութեան փոխադարձ ճանաչման վրայ։
Հայաստանի Արտաքին գործերու նախարարութեան մէջ տեղի ունեցող Հայաստան-ԱՄՆ ռազմավարական երկխօսութեան ամփոփիչ նիստի ժամանակ ունեցած ելոյթին մէջ այս մասին ըսաւ ՀՀ արտաքին գործերի նախարար Արարատ Միրզոյեանը։
«Հայաստանը հաւատարիմ է Ատրպէյճանի հետ յարաբերութիւններու կարգաւորման եւ պետական սահմանի սահմանազատման գործընթացին՝ հիմնուած Ալմա-աթայի հռչակագրի հիմքով տարածքային ամբողջականութեան փոխադարձ ճանաչման վրայ։ Կայ իրական հնարաւորութիւն, պատմական պահ վերջնականացնելու խաղաղութեան պայմանագրի նախագիծը, որու ստորագրումը կրնայ նոր դուռ բանալ տարածաշրջանին մէջ երկարատեւ խաղաղութեան համար»,- յայտնեց Հայաստանի արտաքին գործերու նախարարը։
Միրզոյեան յաւելեց, որ Հայաստանը նաեւ մեծապէս շահագրգռուած է տարածաշրջանային բոլոր հաղորդակցութիւնները ապաշրջափակելու հարցով՝ հիմնուած երկիրներու ինքնիշխանութեան, իրաւասութեան լիակատար յարգման, իրաւահաւասարութեան եւ փոխադարձութեան սկզբունքներու վրայ։ Այդ լաւագոյնս արտայայտուած է «Խաղաղութեան խաչմերուկ» նախաձեռնութեան մէջ, որ յառաջ քաշուած է Հայաստանի կառավարութեան կողմէ։
