Հայաստանի քաղաքական զարգացումները կ՛արտացոլեն Հայաստանի ժողովուրդին ժողովրդավարական յաւակնութիւնները։
Երեւանի մէջ տեղի ունեցող Հայաստան-ԱՄՆ ռազմավարական երկխօսութեան նիստի ժամանակ ունեցած ելոյթին այս մասին ըսաւ ԱՄՆ Եւրոպայի եւ Եւրասիոյ հարցերով արտաքին գործերու փոխնախարար Ճէյմզ Օպրայընը։
«Մեզի համար ոգեւորիչ է տեսնել այն մեծ քայլերը, որ կառավարութիւնը կատարած է, որոշները նաեւ մեր աջակցութեամբ՝ իրաւունքի գերակայութիւնը դարձնելով հիմնարար, պայքարելով փտածութեան դէմ, հնարաւորութիւն տալով մարդոց իրենց դիրքորոշումները ժողովրդավար կերպով յայտնելու։ Մենք կ՛աջակցինք այս բոլոր ջանքերուն»,- նշեց Օպրայըն։
Ան յաւելած է, որ ԱՄՆ նաեւ կ՛աջակցի տարածաշրջանին մէջ տեւական խաղաղութեան հաստատման ջանքերուն, ինչպէս նաեւ կ՛աշխատի տնտեսական հնարաւորութիւններու ընդլայնման ուղղութեամբ։
«Գիտենք, որ Հայաստանի համար անվտանգութիւնը, բարեկեցութիւնը, ժողովրդավարութիւնը կողք-կողքի գոյութիւն ունին։ Այդ ուղղութիւններով իրականացուող բոլոր ջանքերուն կ՛աջակցինք։ Մենք կ՛աջակցինք նաեւ տեւական խաղաղութեան հաստատման ջանքերուն։ Մենք կ՛աշխատինք տնտեսական հնարաւորութիւններու ընդլայնման ուղղութեամբ՝ Կեդրոնական Ասիայէն մինչեւ Միջերկրական ծով։ Եթէ տեւական խաղաղութիւն ըլլայ Հայաստանի ու Ատրպէյճանի միջեւ, ապա այդ հնարաւորութիւնները աւելի լայն պիտի ըլլան»,- մանրամասնեց ԱՄՆ արտաքին գործերու փոխնախարարը։
Ան յիշեցուց, որ վերջերս Հայաստան այցելած էր ԱՄՆ արտաքին գործերու փոխնախարարներէն Պրենտըն Եոտըրը, որ կը համակարգէ թմրամիջոցներու դէմ պայքարի եւ իրաւապահ համագործակցութեան հարցերը։
«Մենք պիտի շարունակենք արդարադատութեան բարեփոխումներու ոլորտին մէջ աշխատանքները։ Մենք նաեւ պաշտպանութեան, անվտանգութեան հարցերով պիտի շարունակենք աշխատիլ։ Նախորդ տարի տեղի ունեցաւ մեր համատեղ առաջին զօրավարժութիւնը, մենք կը սպասենք աւելիին։ Կ՛ակնկալենք աշխատիլ կիպեռանվտանգութեան, սահմաններու, ուժանիւթային, պարէնային անվտանգութեան ոլորտներուն մէջ։ Մենք պատրաստ ենք աջակցելու Հայաստանին։ Մեր ծրագիրը այն է, որ այս ռազմավարական երկխօսութիւնը փոխարինենք ռազմավարական գործընկերութեան յանձնաժողովով, ինչ որ հնարաւորութիւն կու տայ աւելի մեծ խորութեամբ կառուցել փոխգործակցութիւնը»,- եզրափակեց Ճէյմզ Օպրայըն։
