Ռուսաստանի Արտաքին գործերու նախարարութեան ներկայացուցիչներու կողմէ պարբերաբար կը հնչեն տարբեր յայտարարութիւններ, որոնք օգտակար չեն հայ-ռուսական յարաբերութիւններուն առումով:
Նման դիրքորոշում յայտնեց Ազգային ժողովի փոխնախագահ Ռուբէն Ռուբինեանը լրագրողներու հետ զրոյցին:
«Ռուսաստանի Արտաքին գործերու նախարարութեան ներկայացուցիչներու կողմէ պարբերաբար կը հնչեն տարբեր յայտարարութիւններ, որոնք չեմ կարծեր, թէ օգտակար են հայ-ռուսական յարաբերութիւններու առումով»,- ըսաւ Ռուբինեան:
Անդրադառնալով հայ-ռուսական յարաբերութիւններուն վերաբերեալ հարցումին՝ ան ակնյայտ համարեց, որ խնդիրներ կան այդ յարաբերութիւններուն մէջ:
«Ցանկութեան պարագային ամէն ինչ ալ հնարաւոր է յաղթահարել, բայց ինքնանպատակ պէտք չէ ըլլայ յաղթահարումը, յաղթահարումը կ՛ենթադրէ նաեւ խնդիրներու լուծում»,- ըսաւ ԱԺ փոխնախագահը:
