Հըզպալլա երէկ յայտարարեց հակաօդային պաշտպանութեան հրթիռով մը իսրայէլեան «Hermes 900» տիպի յարձակողական անօդաչու թռչող սարք մը վար առնելու մասին: Իսրայէլեան բանակը խոստովանեցաւ, թէ իր անօդաչուներէն մէկը ջախջախուած է Լիբանանի մէջ, մինչ իսրայէլեան լրատուամիջոցներ հաղորդեցին, որ պատերազմի սկիզբէն ի վեր Հըզպալլա կործանած է նշեալ տիպի երեք անօդաչու սարք: Հըզպալլա այլ յայտարարութեամբ մը դիտել տուաւ, որ անօդաչու թռչող սարքերով յարձակում գործած է Կոլանի իսրայէլեան 210 զօրախումբի կեդրոնատեղիին վրայ եւ զայն մասամբ կործանած է:
Իսկ «Ռոյթըրզ» լրատու գործակալութիւնը հաղորդեց, թէ իսրայէլեան զինուորական շարժումները կը նշեն, թէ բանակը կը նախապատրաստուի Հըզպալլայի դէմ զինուորական լայնածաւալ գործողութեան: Անդրադառնալով Սուրիոյ մէջ իսրայէլեան ռմբակոծումներու բազմացումին, գործակալութիւնը նշեց, որ Իսրայէլ կը փորձէ որեւէ յարձակումէ առաջ թուլացնել Հըզպալլայի ռազմական կարողութիւնները:
Նոյն ծիրին մէջ, Իրանի Արտաքին գործերու նախարարութեան բանբեր Նասէր Քանաանի յայտնեց, որ «դիմադրութիւնը ձեռնածալ պիտի չմնայ, եթէ Իսրայէլ Լիբանանի մէջ դիմէ որեւէ արկածախնդրութեան»: Անոր համաձայն, իսրայէլեան կառավարութենէն նախարարներու հրաժարականները նշաններ են ներքին քայքայումի:
