Հայաստանի Հանրապետութեան Ազգային ժողովի նախագահ Ալէն Սիմոնեան կը կարծէ, որ եթէ որեւէ պահի հնարաւոր ըլլայ կամ առաջարկ ըլլայ վերադառնալ երկու երկիրներու միջեւ կապուղինեու վերահսկումը այլ կազմակերպութեան պատուիրակելու տարբերակին, ապա ատիկա կրնայ ըլլալ քննարկելի։
ՀՀ ԱԺ նախագահը նման կարծիք յայտնեց լրագրողներու հետ ճեպազրոյցի ընթացքին՝ անդրադառնալով այն հարցին, թէ արդեօք համաձայնութիւն կայացած է, որ Հայաստանն ու Ատրպէյճանը պատուիրակեն Սիւնիքի ճանապարհը օտարերկրեայ որեւէ կազմակերպութեան:
«Ես չեմ յիշեր, որ նման հարց կայ խաղաղութեան պայմանագրին մէջ. մեր դիրքորոշումը այն է, որ մենք պատրաստ ենք բոլոր ճանապարհներու եւ հնարաւոր կապուղիներու բացման, որ ձեռնտու է նաեւ Ատրպէյճանին»,- ըսաւ Ալէն Սիմոնեան՝ յաւելելով, որ այս պահին որեւէ մեկնաբանութիւն անոր հետ կապուած չի կրնար ընել:
Դիտարկման, որ անոր մասին խօսած է ՀՀ վարչապետ Նիկոլ Փաշինեանը 2020 թուականին, Ալէն Սիմոնեան յիշեցուց, որ անկէ անցած է չորս տարի եւ այդ ընթացքին շատ ջուրեր հոսած են։
«Հայաստանի Հանրապետութեան տարածքին որեւէ գործունէութիւն իրականացնելու համար մենք ստեղծած ենք նաեւ ԱԱԾ-ի համապատասխան բաժին, որ պատասխանատու է եւ կրնայ այդ գործառոյթը իրականացնել: Եթէ որեւէ պահի հնարաւոր ըլլայ կամ առաջարկ ըլլայ վերադառնալ այդ տարբերակին, ատիկա կրնայ ըլլալ քննարկելի: Բայց չեմ կարծեր, որ ատիկա կրնայ ըլլալ տարածաշրջանային որեւէ երկիր»,- յայտնեց Ազգային ժողովի նախագահը՝ նշելով, որ այս պահին նման խօսակցութիւն չկայ:
