Հայաստանի տնտեսութեան նախարար Գէորգ Պապոյեանը ընդունած է Հայաստանի մէջ Հնդկաստանի արտակարգ եւ լիազօր դեսպան Նիլաքշի Սահա Սինհայը:
Զրուցակիցները քննարկած են հայ-հնդկական առեւտրատնտեսական յարաբերութիւններու զարգացման, գիւղատնտեսութեան եւ արդիւնաբերութեան ոլորտներուն մէջ համագործակցութեան ընդլայնման վերաբերող հարցեր։ Նախարարը առաջարկած է դիտարկել Հայաստանի մէջ պղնձաձուլարանի կառուցման տարբերակը՝ օգտագործելով Հնդկաստանի յառաջադէմ արհեստագիտութիւնները։
Գէորգ Պապոյեանը նաեւ հնարաւոր համարած է համագործակցութեան խորացումը ոսկերչույեան ոլորտին մէջ եւ Հնդկաստանի ոսկերչական ցուցահանդէսներուն մէջ Հայաստանի ներկայացումը ազգային տաղաւարով։
Ընդգծելով, որ Հայաստանի կառավարութիւնը կը կարեւորէ քիմիական եւ մետաղագործական արդիւնաբերութիւնը՝ նախարարը հրաւիրած է հնդկական ընկերութիւնները հայկական կողմին հետ համագործակցելու «Կանաչ քիմիա» նախագիծերու շրջանակին մէջ:
Երկուստեք կարեւորուած է միջազգային եւ մասնագիտացուած ցուցահանդէսներու եւ գործարար համաժողովներու կազմակերպումը՝ երկու երկիրներու գործարար համայնքներու միջեւ համագործակցութիւնը խթանելու նպատակով:
Կողմերը անդրադարձած են նաեւ «Խաղաղութեան խաչմերուկ» նախագիծին, որ կրնայ դառնալ ինչպէս տարածաշրջանային, այնպէս ալ աւելի լայն տնտեսական համագործակցութեան կարեւոր բաղկացուցիչ։
