ՃԱՆ ՄԻՆԸ՝ ՓԱՇԻՆԵԱՆԻ ՀԵՏ ՀԱՆԴԻՊՄԱՆ
Հայաստանի Հանրապետութեան վարչապետ Նիկոլ Փաշինեան ընդունած է Շանկհայի համագործակցութեան կազմակերպութեան գլխաւոր քարտուղար Ճան Մինի գլխաւորած պատուիրակութիւնը:
Նիկոլ Փաշինեան ողջունած է Ճան Մինի այցը Հայաստան եւ կարեւորած է կազմակերպութեան հետ համագործակցութեան զարգացումը: Վարչապետը նշած է, որ Հայաստանը հետաքրքրուած է տարածաշրջանային լայն համագործակցութեան խորացմամբ եւ այդ առումով անդրադարձած է ՀՀ կառավարութեան «Խաղաղութեան խաչմերուկ» նախագիծին:
Ճան Մին ընդգծած է Շանկհայի համագործակցութեան կազմակերպութեան քարտուղարութեան շահագրգռուածութիւնը՝ Հայաստանի հետ փոխշահաւէտ յարաբերութիւններու ընդլայնման գործին մէջ:
Զրուցակիցները միտքեր փոխանակած են Շանկհայի համագործակցութեան կազմակերպութեան գործունէութեան եւ հետագայ փոխգործակցութեան շուրջ:
