Հայաստանի մէջ 2024 թուականին պիտի ստեղծուի գիտութեան հանրահռչակման համազգային հարթակ՝ Գիտութեան շաբաթ:
Այս մասին յայտնած են «Գիտուժ» նախաձեռնութեան գրասենեակէն, մանրամասնելով որ Գիտութեան շաբաթը հասարակութեան տարբեր շերտերուն համար նախատեսուած բազմաձեւաչափ միջոցառումներու շարք է, որուն նպատակն է համազգային մակարդակով հանրահռչակել գիտութիւնն ուարհեստագիութիւնները, բացատրել վերջիններուս անփոխարինելի դերը եւ նշանակութիւնը ժամանակակից աշխարհին մէջ, գիտութիւնը դարձնել հրապուրիչ երիտասարդներու համար, ինչպէս նաեւ խթանել քննադատական մտքի եւ գիտելիքահենք խօսոյթի զարգացումը:
Գիտութեան շաբաթը տեղի պիտի ունենայ Երեւանի եւ բոլոր մարզերուն մէջ, 1-6 Հոկտեմբերին։
Հայաստանի մէջ առաջին Գիտութեան շաբաթը պիտի խորհրդանշէ գիտութեան եւ հասարակութեան միջեւ կապը։
«Մօտեցնելով գիտութիւնը հասարակութեան». սա ե՛ւ այս տարուան թեման է, ե՛ւ այն առանցքային նպատակը, որուն ուղղուած պիտի ըլլայ Գիտութեան շաբաթ նախագիծը։
Գիտութեան շաբթուան ընթացքին կը նախատեսուի կայացնել ապակեդրոնացուած միջոցառումներ մանկապարտէզներու, դպրոցներու ու համալսարաններու մէջ: Երեւանի Ազատութեան հրապարակին վրայ բոլոր 6 օրուան ընթացքին տեղի պիտի ունենայ Գիտութեան փառատօն, որ բաժանուած պիտի ըլլայ 3 թեմատիկ մասերու.
- Գիտութիւնը ամէնուրեք է՝ 1-2 Հոկտեմբեր
- Մասնագիտական կողմնորոշում՝ 3-4 Հոկտեմբեր
- Գիտական երեւակայածին միտք՝ 5-6 Հոկտեմբեր
Գիտութեան շաբաթ նախագիծը միջազգային ձեւաչափ է։ Այն պիտի նախաձեռնէ եւ իրականացնէ «Գիտուժ» նախաձեռնութիւնը՝ ՀՀ Կրթութեան, գիտութեան, մշակոյթի եւ մարմնամարզի նախարարութեան եւ ՀՀ Գիտութիւններու ազգային ակադեմիային հետ համագործակցութեամբ։
Գիտուժ նախաձեռնութեան առաքելութիւնն է հզօրացնել Հայաստանը գիտութեան եւ արհեստագիտութիւններու միջոցով։ Գիտութեան հանրահռչակման համազգային միասնական հարթակ ստեղծելը այս առաքելութեանը հասնելու կարեւոր քայլերէն մէկն է։
