Հայաստանի նախագահ Վահագն Խաչատուրեանը ընդունած է արտաքին գործերու նախարար Արարատ Միրզոյեանը:
Ողջունելով նախարարը, հանրապետութեան նախագահնը ըսած է.
«Կ՛ուզեմ շնորհակալութիւն յայտնել ե՛ւ Ձեզ անձամբ, ե՛ւ նախարարութեան այն մեծ ծաւալի արդիւնաւէտ աշխատանքին համար, որ կը կատարէք: Հաւատացէք ինծի, իմ փորձէն ելլելով կրնամ ըսել, որ այս դժուարին պայմաններուն մէջ դուք կը կարենաք գտնել այն լաւագոյն ճանապարհները, որոնք Հայաստանը կը տանին անվտանգ ապագայ:
Կը փափաքիմ շնորհակալութիւն յայտնել նաեւ Ազգային ժողովին մէջ պիւտճէի հաշուետուութեան ներկայացման ընթացքին Ձեր հնչեցուցած պատասխաններուն եւ այդ ոճին համար, որովհետեւ, իսկապէս, բոլորս պարտաւոր ենք, հնարաւորութիւններու սահմաններուն մէջ, քաղաքացիներուն մանրամասն ներկայացնել այն, ինչ կը կատարուի երկրին մէջ եւ երկրէն դուրս, որպէսզի մարդիկ հանգիստ ըլլան եւ վստահ ըլլան, որ Հայաստանի Հանրապետութեան իշխանութիւնները, այդ շարքին նաեւ Արտաքին գործերու նախարարութիւնը, իրենց առօրեայ աշխատանքով ամէն ինչ կ՛ընեն, որ ապրինք անվտանգ եւ երկիրն ալ ընթանայ զարգացման ուղիով: Այլ կերպ չի կրնար ըլլալ»:
Շնորհակալութիւն յայտնելով հանդիպման հնարաւորութեան համար՝ Արարատ Միրզոյեան նշած է. «Պարոն նախագահ, իսկապէս անչափ շոյուած եմ հնչեցուած գնահատականներուն համար: Ես կը կարեւորեմ երկխօսութիւնը քաղաքացիներուն հետ: Կը կարեւորենք, որ մեր քաղաքականութիւնը անոնց համար հասկնալի ըլայ:
Շատ լաւ է նաեւ, որ մենք տարբեր ձեւաչափերով բաւականին յաճախ կը հանդիպինք եւ, մեծ հաշուով գաղտնիք չ՛ըլլար, եթէ ըսենք, որ որոշումները ընդհանուր քննարկումներու բերո»ւմով կը կայացուին»:
Հանդիպման ընթացքին նախարարը հանրապետութեան նախագահին ներկայացուցած երկրի արտաքին քաղաքական կեանքին մէջ առկայ իրադրութիւնն ու զարգացումները: Քննարկուած են Հայաստանի արտաքին քաղաքական մարտահրաւէրները, անոնց չէզոքացման ուղղութեամբ նախարարութեան եւ կառավարութեան կողմէ իրականացուող քայլերը:
Միտքեր փոխանակուած են Արտաքին քաղաքականութեան համար պատասխանատու գերատեսչութեան եւ նախագահական հիմնարկին սերտ համագործակցութեան եւ օրակարգային հարցերու շուրջ միասնական դիրքորոշումներու եւ մօտեցումներու մշակման կարեւորութտեան վերաբերեալ:
