Հայաստանի վարչապետ Նիկոլ Փաշինեան Իրանի մէջ տեսակցեցաւ իսլամական յեղափոխութեան հոգեւոր գերագոյն առաջնորդ Այաթոլլա Ալի Խամինէիի հետ՝ ցաւակցելու նախագահ Իպրահիմ Ռայիսիի եւ միւս պաշտօնատարներուն՝ ուղղաթիռի արկածի պատճառով մահուան առթիւ: Խամինէի յայտնեց, որ հանգուցեալ նախագահը շատ զգայուն էր Հայաստանին հետ կապուած սահմանային խնդիրներուն առնչութեամբ: Իսկ Փաշինեան շեշտեց, որ «այս դժուարին ժամանակահատուածին մէջ մենք նեցուկ կը կանգնինք մեր լաւ բարեկամ եւ հարեւան Իրանի պետութեան ու ժողովուրդին»: Իսկ Իրանի նախագահի ժամանակաւոր պաշտօնակատար Մոհամմատ Մոխպէրի հետ տեսակցութեան ընթացքին Հայաստանի վարչապետը յոյս յայտնեց, որ Ռայիսիի հետ նախանշուած ծրագրերը կը շարունակուին, Հայաստանի անունով խորին ցաւակցութիւն յայտնելով Իրանի պետութեան եւ ժողովուրդին:
