Իսրայէլի կողմէ Կազայի դէմ շղթայազերծուած պատերազմին եւ Այսրյորդանանի ու Երուսաղէմի մէջ շարունակուող ոտնձգութիւններուն լոյսին տակ, Նորվեկիա, Սպանիա եւ Իրլանտա երէկ ճանչցան Պաղեստինի պետութիւնը եւ պահանջեցին անյապաղ վերջ տալ իսրայէլեան բռնութիւններուն: Իրլանտայի վարչապետը վստահութիւն յայտնեց, որ շարք մը երկիրներ շուտով պիտի հետեւին իրենց օրինակին: «Ապագայ չունի սիոնիզմի այս ծայրայեղական տարբերակը, որ կը սնուցանէ իսրայէլացի վերաբնակիչներուն բռնութիւնները պաղեստինցիներուն եւ անոնց հողերուն նկատմամբ», ըսաւ իրլանտացի պաշտօնատարը՝ աւելցնելով, որ պաղեստինցիները արժանի են յոյսով եւ խաղաղութեամբ լեցուն ապագայի:
Սպանիոյ վարչապետ Փետրօ Սանչեզ, իր կարգին, խորհրդարանին մէջ տրուած ուղերձով մը յայտարարեց Պաղեստինի պետութեան ճանաչում՝ Կազայի մէջ 7 Հոկտեմբերէն ի վեր շարունակուող պատերազմի լոյսին տակ: «Իսրայէլի վարչապետ Պենիամին Նեթանիահու կը շարունակէ կործանել Կազան, իսկ մենք խաղաղութեան ձգտող ժողովուրդ ենք եւ այդ մասին կ՛ապացուցեն ժողովրդային խաղաղ ցոյցերը», ըսաւ սպանացի վարչապետը:
Իսկ Նորվեկիոյ վարչապետ Եոնաս Կար Սթոր յայտարարեց Պաղեստինի պետութեան անկախութեան իր երկրին ճանաչումը, շեշտելով որ այդ կը նշանակէ զօրակցիլ չափաւորական ուժերուն, որոնք սկսած են վերատեսութեան ենթարկել իրենց դերը շարունակուող հակամարտութեան մէջ:
Միւս կողմէ, ամերիկեան Սպիտակ տունը յայտարարեց, թէ նախագահ Ճօ Պայտըն կը հաւատայ, որ Պաղեստինի պետութեան ճանաչումը պէտք է իրականանայ բանակցութիւններով, ոչ թէ միակողմանի որոշումներով: Իսկ Ֆրանսայի վարչապետը շեշտեց, որ մինչ Պաղեստինի անկախ պետութեան ճանաչումը բացառուած չէ, Փարիզ կը կարծէ, թէ այս փուլը այդ քայլին դիմելու յարմար առիթը չէ:
Որպէս հակադարձութիւն Պաղեստինի պետութեան ճանաչումին, Իսրայէլի Ելեւմուտքի նախարարութիւնը առկախեց տուրքերու գումարներուն պաղեստինեան իշխանութեան փոխանցումը, ինչպէս նաեւ պաղեստինեան բարձրաստիճան անձնաւորութիւններուն տրամադրուած արտօնագրերը, պահանջելով արտօնութիւն տալ իսրայէլեան յաւելեալ բնակավայրերու կառուցումին:
ՄԱԿ-ի ընդհանուր քարտուղարի տեղակալ Մարթին Կրիֆիթ նշեց, որ անցակէտերու փակումին պատճառով կարելի չէ մարդասիրական օգնութիւն հասցնել Կազայի բնակչութեան: «Իսրայէլ դիտմամբ կը թիրախաւորէ Կազայի մէջ գործող UNRWA-ի հաստատութիւնները եւ կը հաւատանք, որ պատերազմի աւարտը տակաւին հեռու է», շեշտեց Կրիֆիթ՝ աւելցնելով, որ զոհերուն մասին Կազայէն հրապարակուող թիւերը ճշգրիտ են, թէեւ Իսրայէլ կը փորձէ շեշտել հակառակը:
