Ներքին ապահովութեան ուժերու ընդհանուր տնօրէնութիւնը յայտարարեց, որ երկարատեւ հետապնդումներու եւ հետախուզական աշխատանքի շնորհիւ, Տեղեկահաւաքի բաժանմունքը յաջողած է Պէյրութի հարաւային արուարձաններու Սէն Թերեզ շրջանին մէջ ձերբակալել թմրանիւթի վաճառական լիբանանցի մը եւ իր սուրիացի գործընկերը: Ապահովութեան ուժերը գրաւուած շարժանիւէն յայտնաբերած է թմրախոտ եւ քոքային, ատրճանակ մը եւ չորս փամփուշտ: Նախնական հետաքննութեամբ ի յայտ եկած է, որ ձեբակալուած լիբանանցին հետապնդուած է ապահովական ուժերուն կողմէ եւ անոր դէմ արձակուած է ցկեանս բանտարկութեան դատավճիռ, մինչ սուրիացին եւս ծանօթ է իր օրինախախտումներով, մանաւորաբար մարդու վաճառականութեան ոլորտին մէջ:
Երէկ լուսարձակի տակ մնաց Թրիփոլիի նաւահանգիստէն Լիբանան մուտք գործած թրքական ատրճանակներու թղթածրարը: Այս առումով սուր քննադատուեցաւ նաւահանգիստի տնօրէնութիւնն ու ապահովական համակարգը: Որպէս հակադարձութիւն, նաւահանգիստի աշխատակիցներու սենտիքայի նախագահ Ահմատ Սայիտ դատապարտեց «անհիմն տեղեկութիւններու հրապարակումը» եւ զգուշացուց նաւահանգիստին աշխատանքը խափանելու եւ պաշտօնեաները գործազրկութեան մատնելու վտանգէն: Անոր համաձայն, «տեղի ունեցածէն կարելի է խուսափիլ խստացնելով ապահովական քայլերը եւ կառուցողական քննադատութեամբ, ոչ թէ ժխտական շարժումներով»:
