Ընդհանուր անվտանգութեան ծառայութեան Պեքաայի մասնաճիւղը երէկ շարունակեց սուրիացիներու կողմէ ապօրինաբար տնօրինուող ընկերութիւններու եւ վաճառատուներու խուզարկումը եւ Հըրմէլի շրջանին մէջ փակեց շարք մը նման հաստատութիւններ: Նման խուզարկումներ տեղի ունեցան նաեւ հարաւային Սուրի մէջ: Երէկ տարածուած ուսումնասիրութեան մը արդիւնքը ցոյց տուաւ, թէ Սուրիոյ մօտակայ երկիրները ապաստանած սուրիացիները կը նախընտրեն վերադառնալ տուն՝ այդ երկիրներուն մէջ իրենց նկատմամբ բանեցուած ճնշումներուն լոյսին տակ: Երէկ նաեւ կոչ ուղղուեցաւ 27 Մայիսին բողոքի նստացոյց մը կազմակերպելու Եւրոմիութեան Պրիւքսէլի գրասենեակներուն առջեւ՝ պահանջելու համար սուրիացիներու տունդարձի ֆինանսաւորում, որպէսզի անոնք չմնան Լիբանան, այլ վերադառնան հայրենիք:
