Երէկ Իրանի պաշտօնական մամուլը յայտարարեց, թէ Կիրակի երեկոյեան Պավրիզ նահանգին մէջ ինկած ուղղաթիռին մէջ գտնուող բոլոր ճամբորդները եւ անձնակազմը մահացած են: Իրանի նախագահ Իպրահիմ Ռայիսի, արտաքին գործերու նախարար Հըսէյն Ամիր Ապտըլլահեան եւ երկու այլ անձնաւորութիւններ: Ուղղաթիռը ինկած էր դժուարամատչելի շրջանի մը մէջ, ուր կան խոր ձորեր ու խիտ անտառներ: Այս էր պատճառը որ փրկիչ ջոկատները երկար ժամանակ ետք գտան ինկած ուղղաթիռին կտորները:
Դրացի երկիրներու բոլոր քաղաքական առաջին դէմքերը Իրանի ղեկավարութեան ուղարկեցին ցաւակցական նամակներ:
Հայաստանի Հանրապետութեան վարչապետ Նիկոլ Փաշինեան իր ցաւակացագրին մէջ նշեց, թէ կը յայտնէ իր խորազգաց ցաւակցութիւնը նախագահ Իպրահիմ Ռայիսիի եւ արտաքին գործերու նախարար Հըսէյն Ամիր Ապտըլլահեանի ցաւալի մահուան առիթով: Այս դժուար ժամանակամիջոցին, Հայաստան պետական եւ ժողովրդային մակարդակներով նեցուկ կը կանգնի Իրանի դրացի եւ բարեկամ ժողովուրդին:
Ցաւակցող բոլոր ղեկավարները յայտնեցին, թէ նախագահ Իպրահիմ Ռայիսի անկեղծ բանակցող մըն էր ու խոստում յարգող: Ան շատ աշխատեցաւ Իրանի համար ու անոր յարաբերութիւնը զարգացուց տարբեր երկիրներու հետ ու Ռուսիոյ հետ մանաւանդ հասցուց ռազմավարական գործընկերոջ մակարդակին: Ուքրանիոյ պատերազմին մէջ օժանդակեց Ռուսիոյ՝ անոր տրդամադրելով արդիական անօդաչու թռչող սարքեր եւ այլ զէնքեր:
Իրանեան բանակի սպայակոյտի պետը հրահանգեց քննութիւն բանալ այս ուղղաթիռի արկածին շուրջ:
