Երեւանի պետական համալսարանը կը հերքէ մամուլի մէջ տարածուող լուրերը, թէ համալսարանի 50-էն աւելի դասախօսներ միացած են «Տաւուշը յանուն հայրենիքի» շարժման եւ կը պահանեն վարչապետ Նիկոլ Փաշինեանի հրաժարականը։
Երեւանի պետական համալսարանի տարածած յայտարարութեան մէջ կ’ըսուի. «Ընդդիմադիր շարք մը լրատուամիջոցներուն մէջ կը տարածուի տեղեկատուութիւն, թէ իբր ԵՊՀ 50-էն աւելի դասախօսներ միացած են անհասկնալի ինչ-որ յայտարարութեան, ինչ որ չի համապատասխաներ իրականութեան։ Չնայած հանգամանքին, որ քաղաքական շարք մը ուժեր եւ անհատներ, նենգափոխելով ու խեղաթիւրելով իրականութիւնը, կը փորձեն Երեւանի պետական համալսարանը ներքաշել քաղաքական գործընթացներու մէջ, կը վստահեցնենք՝ ԵՊՀ-ի մէջ չկայ եւ չի կրնար ըլլալ քաղաքական որեւէ գործընթաց։ Համալսարանը ապաքաղաքական կրթական հաստատութիւն է, որ կը շարունակէ իրականացնել իր առաքելութիւնը»։
