Հայաստանի իշխանութիւնները յոյսով են, որ Երեւանը աջակցութիւն պիտի ստանայ Եւրոմիութեան Խաղաղութեան հիմնադրամէն, «Քոփընհակընի ժողովրդավարութեան գագաթաժողովի» ընթացքին յայտարարեց վարչապետ Նիկոլ Փաշինեանը։ Ան Դանիայի մայրաքաղաքին մէջ կը մասնակցէր Հայաստանի ժողովրդավարութեան պաշտպանութեան թեմայով քննարկման։
«Մենք հիմա կը սպասենք Եւրոմիութեան որոշման՝ Հայաստանին Եւրոմիութեան Խաղաղութեան հիմնադրամին մէջ ներառելու համար»,- ըսաւ Փաշինեան:
«Politico»-ի խմբագիրի հարցումին՝ արդեօք Երեւանը կ’ակնկալէ՞, որ Եւրոմիութիւնը պիտի լրացնէ Մոսկուայի բացը, Փաշինեանը ուղիղ չպատասխանեց, բայց նշեց՝ Երեւանի քաղաքականութիւնն է բոլոր ոլորտներուն մէջ արտաքին յարաբերութիւններու բազմազանեցումը։
«Հիմա մենք անվտանգութեան դաշտին մէջ կը գործակցինք Հնդկաստանի, Ֆրանսայի եւ միւս երկիրներուն հետ։ Եւ հիմա մենք նմանատիպ գործակցութիւն ունինք Եւրոմիութեան հետ»,- ըսաւ վարչապետը:
Փաշինեան յիշեցուց, որ Հայաստանի մէջ կը գործէ Եւրոմիութեան դիտորդական առաքելութիւնը։ «Ի հարկէ, այդ քաղաքացիական առաքելութիւն է, բայց միւս կողմէ ալ՝ այն նոր գործօն է մեր տարածաշրջանի անվտանգութեան համար։ Առաջին անգամն է, որ ԵՄ-ն որոշ կերպով կերպ ներգրաւուի Հայաստանի անվտանգային օրակարգին մէջ»,- ընդգծեց վարչապետը:
Նիկոլ Փաշինեան անդրադարձաւ նաեւ ՀԱՊԿ-էն դուրս գալու հարցին։ Յայտարարեց, որ ռազմական կառոյցէն Երեւանի դուրս գալը հետագայ քննարկումներու թեմա է։
