«Աւրորա» համաշխարհային մարդասիրական 8-րդ մրցանակը Լոս Անճելըսի մէջ շնորհուած է Գոնկոյի Դեմոկրատական Հանրապետութեան մէջ գործող իրաւապաշտպան, կնկաբուժ Տենիս Մուքվեկէին:
«Աւրորա» մարդասիրական նախաձեռնութեան հաղորդագրութեան համաձայն՝ Մուքվեկէն Գոնկոյի «Փանզի» հիւանդանոցի եւ հիմնադրամի նախագահն է, որ հիմնադրած է 1999-ին՝ մայրական առողջութեան եւ մայրական մահացութեան համակարգային խնդիրը լուծելու նպատակով: Շարունակուող հակամարտութեան եւ պատերազմէն բխող առողջապահական կարիքներու պայմաններուն մէջ՝ հիւանդանոցը դարձած է հակամարտութիւններու ժամանակ սեռային բռնութեան ենթարկուածներու բուժման առաջատար կեդրոններէն մէկը աշխարհի մէջ:
Երեք ժամ տեւած փակ քննարկումէ յետոյ «Աւրորա» մրցանակի Ընտրող յանձնաժողովը հրապարակած է իր որոշումը՝ արժանին մատուցելով բժիշկ Մուքվեկէին խիզախ աշխատանքի եւ մարդու իրաւունքներու պաշտպանութեան նուիրումին համար: Դափնեկիրը կը ստանայ 1 միլիոն ԱՄՆ տոլար պարգեւ եւ նուիրատուութեան շղթան շարունակելու բացառիկ հնարաւորութիւն՝ աջակցելով համայնքային առաջնորդներուն, որոնք կ’օգնեն կարիքի մէջ գտնուող մարդոց:
Հիւանդանոցի ստեղծումէն ի վեր բժիշկ Մուքվեկէն եւ անոր խումբը օգնած են Գոնկոյի մէջ սեռային բռնութենէ տուժած աւելի քան 80 հազար մարդու: Հիւանդանոցին մէջ կը բուժեն ոչ միայն անոնց ֆիզիքական վէրքերը, այլեւ կը տրամադրեն իրաւական աջակցութիւն, ընկերա-տնտեսական վերահամարկում եւ ընկերա-հոգեբանական ծառայութիւններ: Մուքվեկէն չէ ընկրկած կանանց պաշտպանութեան եւ սեռային բռնութեան մեղաւորները պատասխանատուութեան ենթարկելու գործին մէջ՝ դէմ դուրս գալով նաեւ Գոնկոյի կառավարութեան եւ Գոնկոյի արեւելեան հատուածը պաշարած զինուած խումբերուն: 2018 թուականին ան արժանացած է Խաղաղութեան Նոպէլեան մրցանակի։
Ստեղծուելով Հայոց ցեղասպանութենէն վերապրողներու անունով՝ ի երախտագիտութիւն զանոնք փրկողներու՝ «Աւրորա» մարդասիրական նախաձեռնութիւնը կը ձգտի լուծելու մարդասիրական խնդիրները աշխարհի տարբեր անկիւններու մէջ՝ օգնելով ամենակարիքաւորներուն: «Աւրորա»-ն արդէն նախաձեռնած է եւ աջակցած աւելի քան 427 նախագիծի 56 երկրի եւ տարածքի մէջ՝ զգալի ազդեցութիւն գործելով խիստ կարիքի մէջ գտնուող մօտաւորապէս 3,2 միլիոն մարդու կեանքին վրայ:
