Աշխատանքային այցով Դանիոյ Թագաւորութիւն գտնուող Հայաստանի Հանրապետութեան վարչապետ Նիկոլ Փաշինեանը հանդիպում ունեցած է Դանիոյ վարչապետ Մեթթէ Ֆրետերիքսենի հետ:
Զրուցակիցները քննարկած են Հայաստան-Դանիա բազմոլորտ համագործակցութեան վերաբերող հարցեր:
Մեթթէ Ֆրետերիքսընը ողջունած է Հայաստանի վարչապետին այցը Քոփընհակըն եւ ընդգծած է իր գլխաւորած կառավարութեան պատրաստակամութիւնը՝ զարգացնելու եւ ընդլայնելու փոխգործակցութիւնը Հայաստանի հետ:
Վարչապետ Փաշինեան շնորհակալութիւն յայտնած է ջերմ հիւրընկալութեան համար եւ կարեւորած է կապերու զարգացման ուղղութեամբ հետեւողական քայլերու իրականացման անհրաժեշտութիւնը:
Միտքեր փոխանակուած են երկուստեք հետաքրքրութիւն ներկայացնող միջազգային եւ տարածաշրջանային օրակարգի շարք մը հարցերու շուրջ։ Կարեւորուած է նաեւ բազմակողմ հարթակներու վրայ շարունակական համագործակցութիւնը:
Նիկոլ Փաշինեան զրուցակցին ներկայացուցած է Հայաստան-Ատրպէյճան խաղաղութեան գործընթացը, Հարաւային Կովկասի տարածաշրջանին մէջ առկայ իրավիճակը: Տարածաշրջանային հաղորդուղիներու ապաշրջափակման առումով վարչապետը անդրադարձած է Հայաստանի կառավարութեան «Խաղաղութեան խաչմերուկ» նախագիծին:
Միտքեր փոխանակուած են նաեւ Հայաստան-Եւրոպական միութիւն համագործակցութեան շուրջ:
Նիկոլ Փաշինեան Դանիոյ վարչապետ Մեթթէ Ֆրետերիքսընը պաշտօնական այցով հրաւիրած է Հայաստան: Տիկին Ֆրետերիքսընը հրաւէրը սիրով ընդունած է:
