Հայաստանի մէջ կը շարունակուի «Տաւուշը յանուն Հայրենիքի» շարժումին բողոքի արարքները: Երէկ երեկոյեան, Երեւանի Սուրբ Աննա եկեղեցւոյ շրջափակին մէջ Բագրատ Արք. Գալստանեան եզրափակեց տեղի ունեցած գործողութիւններն ու անոնց արդիւնքները: Նախապէս, երէկ առաւօտեան ժամերէն սկսեալ քաղաքացիներ հաւաքուած էին մայրաքաղաքի եւ մարզերու զանազան շրջաններու մէջ` փակելու ճամբաները եւ յառաջացնելով խճողումներ: Անհնազանդութեան գործողութիւններուն ընթացքին ոստիկանութիւնը յայտարարեց 156 քաղաքացի ձերբակալելու մասին, մինչ Բագրատ Սրբազանի առաջնորդած երթը սկսաւ Հանրապետութեան հրապարակէն, անցնելով մշակութային զանազան հաստատութիւններէ, ապա վերադարձաւ հրապարակ: Ցուցարարներ երէկ փակեցին նաեւ Երեւան-Սեւան մայրուղին, մայրաքաղաքի հարաւային մուտքը, Հայաստան-Իրան միջպետական մայրուղին եւ Վրաստան առաջնորդող Բագրատաշէնի ճամբան:
