Միացեալ Նահանգներու արտաքին գործերու նախարար Անթոնի Պլինքըն Իսրայէլի պաշտպանութեան նախարար Եոավ Կալանթի հետ ունեցած հեռաձայնային հաղորդակցութեան ընթացքին ընդգծեց Ռաֆահի մէջ իսրայէլեան գործողութիւն իրականացնելու ամերիկեան ընդդիմութիւնը, միաժամանակ յանձնառութիւն յայտնելով Համասը պարտութեան մատնելու մտադրութեան: Պլինքըն շեշտեց պաղեստինցի քաղաքացիներուն անվտանգութիւնը պաշտպանելու անհրաժեշտութիւնը, պահանջելով երաշխաւորել մարդասիրական օգնութեան փոխանցումը Կազայի մէջ պաշարուած ժողովուրդին:
Իսրայէլի վարչապետ Պենիամին Նեթանիահու միւս կողմէ շեշտեց Համասը պարտութեան մատնելու անհրաժեշտութիւնը, խոստանալով պաղեստինեան նշեալ շարժումը շարունակաբար ուժգին հարուածել: «Ջանք պիտի չխնայենք տուն վերադարձնելու մեր գերիները», ըսաւ վարչապետը՝ պատասխանելով գերիներուն տունդարձը պահանջող իսրայէլացի ցուցարարներու հարցադրումներուն: «Պէտք է նախ կործանենք Համասը, ապա սկսինք խօսիլ պատերազմին յաջորդող օրերու դրութեան մասին: Մենք այսօր կը դիմագրաւենք այնպիսի մարտահրաւէրներ, որ երբեք չեն դիմագրաւած արդի բանակները: Պէտք է մենք մեզ պաշտպանենք, առանց ամերիկացիներէն եւ ուրիշներէ օգնութիւն հայցելու», ըսաւ Նեթանիահու:
