Հըզպալլայի ընդհանուր քարտուղար սայիտ Հասան Նասրալլա ողջոյնի խօսք ուղղեց բոլոր ճակատներուն վրայ կռուող Հըզպալլայի անդամներուն, «որոնք կը կերտեն հերոսութեան եւ քաջութեան մեծագոյն դրուագները»: Կուսակցութեան ղեկավարներէն Մուսթաֆա Պէտրըտինի ահաբեկումին 8-րդ տարելիցին նուիրուած իր խօսքին մէջ Նասրալլա շեշտեց, որ հակառակ պաշարումին եւ ամերիկեան շարունակական ճնշումներուն, Սուրիա չէ շեղած Պաղեստինեան դատին զօրակցող իր սկզբունքային կեցուածքէն, մերժելով տեղի տալ ամերիկեան քաղաքականութիւններուն: «Դիմադրութեան ճակատին նպատակներէն է վերականգնել պաղեստինցիներուն իրաւունքները», ըսաւ Հըզպալլայի ընդհանուր քարտուղարը, զգուշացնելով Իսրայէլի հետ յարաբերութիւնները բնականոնացնելու ուղեգիծէն:
