Լիբանանեան զանազան շրջաններու մէջ երէկ շարունակուեցան ապօրինի առեւտուր տնօրինող սուրիացիներուն եւ անոնց հաստատութիւններուն հետապնդումը: Թրիփոլիի մէջ, Ընդհանուր անվտանգութեան ծառայութիւնը փակեց շարք մը վաճառատուներ, որոնք կը տնօրինէին ապօրինաբար Լիբանանի մէջ ապրող սուրիացիներ: Իսկ Պաալպաք-Հըրմէլ գաւառին մէջ ապահովութեան ուժերը փակեցին 25 խանութ եւ ձերբակալեցին 45 սուրիացի: Նմանօրինակ խուզարկումներ տեղի ունեցան նաեւ հարաւային Սուր քաղաքին մէջ, առ ի գործադրութիւն դատական մարմիններու որոշումներուն եւ Ընդհանուր անվտանգութեան ծառայութեան ընդհանուր տնօրէնի պաշտօնակատար զօրավար Էլիաս Պէյսարիի ցումունքներուն:
Ընդհանուր անվտանգութեան ծառայութիւնը երէկ յայտարարեց, թէ այսօր պիտի կազմակերպէ խումբ մը սուրիացիներու տունդարձ` Քաայի եւ Արսալի ասհմանային անցակէտերուն վրայով:
Վարչապետի պաշտօնակատար Նեժիպ Միքաթի դատապարտեց սուրիացի տեղահանուածներուն հարցով իր կառավարութեան ուղղուած ամբաստանութիւնները: «Այս արշաւը կը նպատակադրէ իրականութիւնները քօղարկել` յանուն ամբոխավարութեան, փորձելով անդամալուծել կառավարութեան աշխատանքը եւ զայն մղել ներքին տարակարծութիւններու եւ վիճաբանութիւններու», ըսաւ Միքաթի եւ ահազանգեց, որ նշեալ դրութիւնը կ’առաջնորդէ անտեղի լարուածութեան:
