Հայ եկեղեցին Յիսուս Քրիստոսի համբարձման օրը կը նշէ Քրիստոսի յարութեան՝ Զատիկին 40-րդ օրը: Յարութենէն ետք, ըստ Աւետարաններուն, Քրիստոս 40 օր մնացած է երկրի վրայ, իրական եւ հոգեղէն մարմնով երեւցած է Իր աշակերտներուն, ուսուցանած, օրհնած ու պատգամներ տուած է անոնց: 40-րդ օրը Ան առաքեալներու աչքին առջեւ, Իր նիւթեղէն մարմնով համբարձած է երկինք:
Քրիստոսի Համբարձման տօնը հայերը աւանդաբար նշած են ժողովրդական հանդիսութիւններով: Նախապէս կը կատարուէր ծաղկահաւաք, բազմագոյն ծաղիկներ կը դրուէին աղբիւրի ջուրով լեցուած ամանի մէջ, ուր աղջիկները կը դնէին «վիճակի առարկաներ»՝ իրենց պատկանող փոքրիկ իրեր: Հարսերն ու աղջիկները միասին կ’երթային բնութեան գիրկը՝ դաշտին կամ այգիին մէջ զբօսնելու-ուրախանալու: Կ’ուտէին, կը խմէին ու կ’երգէին, իսկ յետոյ կը սկսէր վիճակահանութիւնը: Երեսը քօղով ծածկուած փոքրիկ աղջիկ մը կը նստեցնէին մէջտեղը, վիճակի ամանին մօտ, կ’երգէին աւանդական քառեակներ, իսկ աղջնակը ամէն քառեակէն յետոյ իր մը կը հանէր ծաղիկներով ու ջուրով լեցուն ամանէն: Որուն որ կը պատկանէր առարկան, կը համարուէր, որ անոր մասին էր երգուած քառեակը:
Արդարեւ, Համբարձման տօնին առիթով եւ առ ի պահպանումն նշեալ աւանդութեան, Հինգշաբթի, 9 Մայիս 2024-ին, Նոր Սերունդ մշակութային միութեան Ընկերային դիւանը կազմակերպած էր գեղեցիկ շրջապտոյտ մը՝ հաւաքելով Միութեան շուրջ համախմբուած բարեկամներն ու մօտիկ շրջանակը: Պտոյտին ուղղութիւնն էր Լիբանանի գեղատեսիլ վայրերէն՝ Պրումմանան:
Խումբը նախ այցելեց Մար Շաայա վանքը, որ հիմնուած է 1700-ական թուականներուն: Հոն մեզ ընդունեց ընդհանուր պատասխանատու վանական հայրը եւ վանքին պատմականը ներկայացուց: Այցելցինք եկեղեցին, ուր Հայր Սուրբը իր պատգամը տուաւ Համբարձման տօնին առիթով եւ ներկաները շարականներ երգեցին:
Պտոյտին մասնակիցները շրջագայեցան վանքին մէջ եւ ծանօթացան անոր հետաքրքրական բաժիններուն: Ներկաները մեծ գոհունակութիւն ստացան այս այցով, ի մասնաւորի նկատի առնելով այն հանգամանքը, որ Համբարձման տօնին խորհուրդը ապրեցան վանք այցելութեան ընդմէջէն:
Ապա մասնակիցները հանդիպեցան նաեւ վանքին պատկանող հողաշերտ մը, ուր կար ագարակ եւ հոն խնամուող կենդանիներ: Այցելութիւն կատարուեցաւ նաեւ վանքին շտեմարանը:
Այնուհետեւ ուղղութիւնը դէպի Ժուրթ Էլ Պալլութ էր, ուր գեղեցիկ եւ դաշտային պտոյտի յարմար բնութեան մէջ ճաշեցին լիբանանեան համադամ աղանդերներ: Տեղի ունեցաւ Համբարձման վիճակաձգութիւն, բոլորը ստացան քառեակներ, ուրախ երգով ու պարով մթնոլորտի մէջ:
Այս առիթով ներկաներուն բաժնուեցաւ յատուկ յուշանուէրներ՝ Հայաստանէն բերուած:
Շատ ուրախ եւ հաճելի օր մը անցընելէ ետք բոլոր բարձր տրամադրութեամբ վերադարձան իրենց տուները, վառ պահելով Համբարձման տօնին համախմբուելու եւ բնութեան գիրկը այցելելու աւանդոյթը:
Ներկայ Մը
