Ապրիլ 24-ին Մոնթեվիտէոյի «Արմէնիա» հրապարակին վրայ տեղի ունեցաւ Հայոց ցեղասպանութեան 109-րդ տարելիցին նուիրուած միջոցառում: Ուրուկուահայ Բազմամիութենական կազմակերպութեան նախաձեռնութեամբ կայացած միջոցառման շրջանակներուն մէջ ելոյթներով հանդէս եկան ՀՀ դեսպանութեան գործերու ժամանակաւոր հաւատարմատար Մարիամ Գէորգեանը եւ Ֆրանսայի դեսպան Ժան-Փոլ Սեյթրեն:
Շնորհակալութիւն յայտնելով Ուրուկուէյի կառավարութեան ու ժողովուրդին՝ Հայոց ցեղասպանութեան միջազգային ճանաչման գործընթացին մէջ առաջամարտիկ ըլլալու եւ ցեղասպանութենէն մազապուրծ եղած հայերը ընդունելու համար, Մ. Գէորգեան ընդգծեց, որ Ուրուկուէյը բոլոր դժուարին պահերուն մշտապէս եղած է Հայաստանի եւ հայ ժողովուրդի կողքին:
Ֆրանսայի դեսպանը իր ելոյթին մէջ նշեց, որ Ֆրանսան Հայոց ցեղասպանութեան մասին բարձրաձայնած առաջին երկիրներէն է եւ օրէնքով ճանչցած է զայն: Բարձր գնահատելով հայ-ֆրանսական դարաւոր բարեկամութիւնը՝ դեսպանը վստահեցուց, որ այն պիտի շարունակէ ամրապնդուիլ եւ Ֆրանսան այսուհետ եւս անվերապահօրէն պիտի աջակցի Հայաստանին: Ֆրանսայի դեսպանը նաեւ մէջբերեց Հայաստանի մասին աշխարհահռչակ երգիչ Շարլ Ազնաւուրի խօսքերէն: Դեսպանը իր ելոյթին մէջ նաեւ անդրադարձաւ Միսակ եւ Մելինէ Մանուշեաններուն եւ անոնց կեանքի կարեւոր դրուագներուն։
Բազմամիութենական կազմակերպութեան անունով ելոյթ ունեցաւ ՍԴՀԿ Ուրուկուէյի Վարիչ մարմինի փոխատենապետուհի ընկերուհի՝ Լաուրա Ասլանեանը։ Վերջինս իր խօսքին մէջ նշեց, որ ցեղասպան քաղաքականութիւնը հայ ժողովուրդին նկատմամբ կը շարունակուի մինչ այսօր, որուն վառ ապացոյցն է արցախահայութեան դէմ Ատրպէյճանի սանձազերծած ցեղային զտումն ու բռնի տեղահանումը, որ միջազգային հանրութիւնը չկանխեց։ Ընկերուհի Ասլանեան հայութեան կոչ ըրաւ ինքննադատաբար մօտենալու հարցին՝ հասկնալու համար, թէ որո՞նք են մեր սխալներն ու բացթողումները այս հարցին մէջ։ Նաեւ պէտք է շեշտել Սփիւռքի դերակատարումը այս հարցին մէջ. արդեօ՞ք տեղին է եւ օրինական, որ արտասահմանէն փորձեն սասանել Հայոց պետականութեան կայունութիւնը եւ քաղաքական շահեր հետապնդել, երբ պետութեան ապագան վտանգի մէջ է։ Մեր մօտեցումը այն է, որ աւելի քան երբեւէ Սփիւռքը պէտք է կանգնի Հայոց պետութեան կողքին, որուն գլխաւոր պահանջը պիտի ըլլայ պետութեան հզօրացումն ու ժողովրդավարական հիմնարկները յարգելը։
Միջոցառման շրջանակներուն մէջ Մոնթեվիտէոյի քաղաքապետարանին որոշմամբ բացուեցապ յուշատախտակ՝ ի պատիւ Անթոնիօ Ռուբէնեանի, որ հանդիսացած է «Հայաստան» հրապարակի բացման հիմնական նախաձեռնողը եւ ռատիօ «Արմէնիա»-ի հիմնադիր տնօրէնը շուրջ 58 տարի:
Միջոցառման ներկայ էին Ուրուկուէյի արտաքին յարաբերութիւններու նախարարի տեղակալ Նիքոլաս Ալպերթոնին, զբօսաշրջութեան նախարար Էտուարտօ Սանկինեթթին, Մոնթեվիտէոյի քաղաքապետ Մաուրիսիօ Սունինօն, առողջապահութեան նախարարի տեղակալ Խօսէ Լուիս Սաջեանը, շարք մը խորհրդարանականներ եւ քաղաքական-հասարակական գործիչներ, օտարերկրեայ դեսպաններ, դպրոցականներ եւ համայնքի ներկայացուցիչներ:
