Կազմակերպութեամբ ՍԴ Հնչակեան Կուսակցութեան Արեւմտեան Ամերիկայի Վարիչ մարմինին, Կիրակի, 21 Ապրիլ 2024-ի երեկոյեան, շքեղ ճաշկերոյթ մը տեղի ունեցաւ ՀԿԲՄ-ի կեդրոնին մէջ, ի պատիւ RED ֆիլմի բեմադրիչ եւ արտադրիչ, ինչպէս նաեւ գիրքերու հեղինակ Գատիր Ագընի եւ Թուրքիոյ խորհրդարանի հայ նախկին երեսփոխան Կարօ Փայլանի:
Ողջերթի սոյն նախաձեռնութեան ներկայ էին ՍԴՀԿ Կեդրոնական վարչութեան ատենապետ ընկ. Տոքթ. Համբիկ Սարաֆեան, ինչպէս նաեւ կուսակցական մասնաճիւղերու, ՀՄՄ-ի, Նոր Սերունդ մշակութային միութեան, Հայ ամերիկեան խորհուրդի, ՀԿԲՄ-ի եւ այլ կառոյցներու ներկայացուցիչներ:
Կազմակերպիչ յանձնախումբին անունով բարի գալուստ մաղթեց հանդիսավար Հերի Իւնել: Ապա ելոյթ ունեցաւ Հայ ամերիկեան խորհուրդի ատենապետ Սեւակ Խաչատուրեան` ներկայացնելով «Մասիս» հրատարակչականի աշխատանքները` Հնչակեան կուսակցութեան արխիւները մէկտեղելու նպատակով:
Այս առթիւ ողջոյնի ջերմ խօսքերով ելոյթներ ունեցան շրջանիս Վարիչ մարմինի ատենապետ ընկ. Վազգէն Խոտանեան եւ ՍԴՀԿ Կեդրոնական վարչութեան ատենապետ ընկ. Տոքթ. Համբիկ Սարաֆեան: Անոնք դրուատելէ ետք զոյգ հիւրերու՝ Գատիր Ագընի եւ Կարօ Փայլանի օգտաշատ ներդրումներն ու հայանպաստ ծառայութիւնները, նորանոր յաջողութիւններ մաղթեցին իրենց հետագայ ծրագրերուն:
Շնորհակալական ելոյթով հանդէս եկաւ Գատիր Ագըն եւ գովեստով արտայայտուեցաւ հայաշատ վայրերու մէջ իր անձին հանդէպ ցուցաբերուած ջերմ ու յարգալիր ընդունելութեանց համար:
Կարօ Փայլան իր ելոյթին մէջ նշեց, որ հաւատացող մըն է մեր գաղափարախօսութեան: Իսկ անդրադառնալով ժամանակակից իրավիճակին, ըսաւ. «Պատմութենէն հարկ է դասեր առնել եւ հարցերը այս ձեւով պէտք չէ շարունակուին: Շատ բան փոխուեցաւ երկրաշարժին առթիւ…: Ազգայնականներն ալ փոխուեցան….: Մենք պէտք է կամուրջներ շինենք…: Դժուար է նախապաշարումները փոխել: Եկէք, միասնաբար սիրով աշխատինք», յարեց Կ. Փայլան, վերապահ լաւատեսութիւն մը արտայայտելով իր եզրափակիչ խօսքին մէջ:
Աւարտին, ներկաները իրենց հետ տարին Գատիր Ագընի հրատարակած պատմա-վաւերագրական հատորներէն:
