Ֆրանսան որոշած է ետ կանչել Ատրպէյճանի մէջ իր դեսպանը խորհրդակցութիւններու համար՝ կապուած վերջին ամիսներուն Ատրպէյճանի կողմէ երկու երկիրներու յարաբերութիւններուն վնասող միակողմանի գործողութիւններու շարունակութեան հետ։
Այս մասին կը նշուի Ֆրանսայի Արտաքին գործերու նախարարութեան տարածած հաղորդագրութեան մէջ։
«Հանրապետութեան նախագահը (խմբ. Ֆրանսայի նախագահ Էմանուէլ Մաքրոն) ընդունած է մեր դեսպանը այս թեմայով։ Ան ափսոսանք յայտնած է Ատրպէյճանի գործողութիւններուն համար եւ ցանկութիւն յայտնած է, որ ատրպէյճանական կողմը պարզաբանէ իր մտադրութիւնները»,- կը նշուի հաղորդագրութեան մէջ։
Բացի ասկէ նաեւ կը նշուի, որ Ֆրանսան կը վերահաստատէ իր աջակցութիւնը Հայաստանի եւ Ատրպէյճանի միջեւ յարաբերութիւններու կարգաւորման՝ միաժամանակ յարգելով միջազգային իրաւունքը եւ երկու երկիրներու տարածքային ամբողջականութիւնը՝ ընդգծելով. «Այս կարգաւորումը օգուտ պիտի բերէ ինչպէս երկիրներուն, այնպէս ալ ամբողջ տարածաշրջանին»:
