Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց Հայաստանի Հանրապետութեան մէջ Եւրոմիութեան քաղաքացիական դիտորդական առաքելութեան ղեկավար Մարքուս Ռիթերը։
Ամենայն Հայոց կաթողիկոսը ողջունեց Մարքուս Ռիթերի այցը համայն հայութեան հոգեւոր կեդրոն՝ նշելով, որ այս հանդիպումը պատեհ առիթ է ծանօթանալու ԵՄ դիտորդական առաքելութեան առջեւ դրուած խնդիրներուն։
Վեհափառ Հայրապետը իր մտահոգութիւնը յայտնեց առկայ լարուածութեան եւ սահմանամերձ բնակավայրերու ժողովուրդի ապահովութեան առնչութեամբ՝ ընդգծելով, որ Ատրպէյճանի ոտնձգութիւններն ու առաջադրուող պահանջները նոր անվտանգային մարտահրաւէրներու առջեւ կը կանգնեցնեն Հայաստանը, նաեւ կը վտանգեն խաղաղութեան հաստատման բանակցային գործընթացը։
Նորին Սրբութիւնը գնահատեց բոլոր այն ջանքերը, որ տիրող դժուարին իրավիճակին մէջ բարեկամ երկիրներու եւ միջազգային կառոյցներու աջակցութեամբ կ՛ուղղուին ի նպաստ տարածաշրջանին մէջ խաղաղութեան ու կայունութեան վերականգնման։
Իր հերթին, ԵՄ դիտորդական առաքելութեան ղեկավարը Վեհափառ Հայրապետին տեղեկութիւններ փոխանցեց դիտորդական առաքելութեան գործունէութեան եւ սահմանային իրավիճակին վերաբերեալ՝ վստահեցնելով, որ կարելին ի գործ պիտի դրուի առաքելութեան կողմէ՝ նպաստելու սահմանային լարուածութեան նուազեցման ու Հայաստանի սահմանամերձ շրջաններուն մէջ կայունութեան հաստատման։
