Կ՛ԸՍԷ ԱՐԹՈՒՐ ՅՈՎՀԱՆՆԻՍԵԱՆ
Հայաստանը չի կրնար Ատրպէյճանի հետ սահմանազատման գործընթացի երթալ՝ առանց իրաւական հիմքերու:
Խորհրդարանական ճեպազրոյցի ժամանակ այս մասին վստահեցուց Հայաստանի Ազգային ժողովի իշխող «Քաղաքացիական պայմանագիր» խմբակցութեան քարտուղար Արթուր Յովհաննիսեանը ՝ անդրադառնալով ընդդիմութենէն հնչող մտահոգութեան, թէ Հայաստանի իշխանութիւնը կրնայ առանց իրաւական հիմքերը յստակացնելու Տաւուշի հատուածին մէջ Ատրպէյճանի հետ սահմանի սահմանազատման գործընթաց սկսիլ, նոյնիսկ զիջումներու երթալ:
«Չի կրնար ըլլալ գործընթաց առանց իրաւական հիմքերու: Մենք ասոր մասին բազմիցս խօսած ենք»,- ըսաւ Արթուր Յովհաննիսեանը:
Ան վստահեցուց՝ ամէն ինչ կ՛ընեն ելլելով իրաւական հիմքերէ, անոր համար գործընթացները դանդաղ կ՛ընթանան: «Որեւէ քարտէզ, որեւէ միլիմեթր պէտք է ունենայ իրաւական հիմք: Առանց ասոր մենք յառաջ չենք շարժիր»,- նշեց պատգամաւորը:
Պաշտպանութեան եւ անվտանգութեան հարցերու յանձնաժողովի նախագահ Անդրանիկ Քոչարեան յաւելեց, որ բազմաթիւ իրաւական հիմքերու մասին խօսուած է. «Խորհրդային միութեան փլուզումէն յետոյ ի՞նչ սահմաններով անջատուեցան միութենական պետութիւնները, վարչական սահմանները ո՞ւր էին: Իրաւական արձանագրում կար: Բայց յետոյ պարզուեցաւ, որ այդ իրաւական արձանագրումները դեռ ճշդումներու խնդիր ունին»,-ըսաւ ան՝ ընդգծելով, որ սահմանազատման հարցերով յանձնաժողովները անոր համար ստեղծուած են, այդ խնդիրները պէտք է լուծուին:
Քոչարեան շեշտեց, որ սահմանազատման եւ սահմանագծման գործընթացին նպատակը Ատրպէյճանի հետ խաղաղութեան հասնիլն է:
