Հայաստանի Հանրապետութեան Ազգային ժողովի նախագահ Ալէն Սիմոնեան ընդունած է Ղազախստանի Հանրապետութեան նախագահ Քասիմ-ժոմարթ Թոքաեւը:
Ողջունելով Ղազախստանի նախագահը Ազգային ժողովին մէջ, համերաշխութիւն յայտնած է բարեկամ ղազախ ժողովուրդին ջրհեղեղի արհաւիրքի դէմ պայքարին մէջ:
«Պարո՛ն նախագահ, Ձեր պաշտօնական այցը Հայաստան կարեւոր քայլ է մեր երկու երկիրներուն միջեւ փոխշահաւէտ յարաբերութիւններու զարգացման եւ ամրապնդման համար: Պիտի ուզէի նշել Հայաստանի եւ Ղազախստանի միջեւ հաստատուած փոխգործակցութեան բարձր մակարդակը երկկողմ եւ բազմակողմ ձեւաչափերով՝ յատկապէս ընդգծելով համագործակցութիւնը միջխորհրդարանական հարթակներու մէջ»,- ըսած է ԱԺ նախագահը:
Քասիմ-Ժոմարթ Թոքաեւը բարձր գնահատած է Հայաստանի եւ Ղազախստանի միջեւ 25-ամեայ բարեկամութեան ու համագործակցութեան պայմանագրի վրայ հիմնուած յարաբերութիւնները՝ ընդգծելով տնտեսական, քաղաքական եւ մշակութային ոլորտները: Ղազախստանի նախագահը կարեւորած է խորհրդարաններուն միջեւ աշխոյժ փոխգործակցութիւնը՝ ընդգծելով խորհրդարանի դերը հայ-ղազախական համաձայնագրերու վաւերացման գործընթացին մէջ:
Ալէն Սիմոնեանը Քասիմ-Ժոմարթ Թոքաեւին ներկայացուցած է Հայաստանի Հանրապետութեան կառավարութեան «Խաղաղութեան խաչմերուկ» նախագիծը՝ կարեւորելով Ղազախստանի աջակցութիւնն ու մասնակցութիւնը ծրագրի իրականացման հարցում:
««Խաղաղութեան խաչմերուկ»ը առանցքային դերակատարում ունի Հարաւային Կովկասի մէջ անվտանգութեան հաստատման, ինչպէս նաեւ տարածաշրջանի բոլոր երկիրներու համար առեւտրատնտեսական յարաբերութիւններու զարգացման հարցով»,- ընդգծած է խորհրդարանի ղեկավարը:
Հանդիպման ընթացքին քննարկուած են հայ-ատրպէյճանական յարաբերութիւններու կարգաւորման գործընթացը, հայ-ղազախական երկկողմ եւ բազմակողմ առեւտրատնտեսական, մշակութային ու քաղաքական փոխգործակցութեան սերտացման վերաբերող հարցեր:
Հանդիպման աւարտին Ալէն Սիմոնեանը եւ Քասիմ-Ժոմարթ Թոքաեւը այցելած են Մատենադարան, ուր Ղազախստանի նախագահին ներկայացուած են թանգարանին մէջ պահուող հայերէն եւ օտարալեզու, այդ շարքին՝ հայատառ ղփչաղերէն ձեռագրերը:
«Մատենադարանին մէջ պահուող եզակի ձեռագրերը միջմշակութային համագործակցութեան խորհրդանիշեր են եւ կը յիշեցնեն մեզ երկարամեայ կապերուն մասին, որոնք գոյութիւն ունեցած են տարածաշրջանին մէջ եւ անոր սահմաններէն դուրս»,- նշած է ԱԺ նախագահը:
