Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց աւստրիացի ուխտաւորներ՝ գլխաւորութեամբ Աւստրիոյ Կրաց-Սեքաու թեմի առաջնորդ Վիլհելմ եպիսկոպոս Քրաութվաշլի եւ ուղեկցութեամբ Կեդրոնական Եւրոպայի եւ Շուէտի Հայրապետական պատուիրակ գերաշնորհ Տ. Տիրան եպիսկոպոս Պետրոսեանի։
Ամենայն Հայոց կաթողիկոսը, անդրադառնալով ներկայ ժամանակներուն հայ ժողովուրդին առջեւ ծառացած մարտահրաւէրներուն, իր շնորհակալութիւնը յայտնեց Աւստրիոյ իշխանութիւններուն եւ ժողովուրդին Հայաստանին ցուցաբերած աջակցութեան համար։
Նորին Սրբութիւնը իր օրհնութիւնը փոխանցեց ուխտաւորներուն՝ անոնց այցը Հայաստան եւ Մայր Աթոռ Սուրբ Էջմիածին նկատելով զօրակցութեան եւս մէկ վկայութիւն։
