Իսրայէլեան եւ ամերիկեան լրատուամիջոցներ հաղորդեցին, թէ Իսրայէլի պատերազմական սեղմ կառավարութիւնը տակաւին կը մտադրէ հակադարձել Իրանի հրթիռային յարձակումներուն՝ թիրախաւորելով ենթակառոյցներ, առանց պատճառելու մարդկային վնասներ: Իսրայէլեան կառավարութիւնը նաեւ կը քննարկէ հակադարձութեան դիւանագիտական միջոցները՝ խստացնելու Իրանի մեկուսացումը եւ անոր նկատմամբ սահմանուած պատժամիջոցները:
Միւս կողմէ, Իրանի արտաքին գործերու նախարար Հըսէյն Ամիր Ապտալլահեան իր բրիտանացի պաշտօնակից Տէյվիտ Գամերոնին տեղեկացուց, որ իրենք չեն ուզեր սրել լարուածութիւնը, սակայն իսկոյն եւ աւելի ուժգին պիտի հակադարձեն, եթէ Իսրայէլ դիմէ ոտնձգութիւններու: Իսկ Իրանի ազգային անվտանգութեան գերագոյն խորհուրդը Իսրայէլը զգուշացուց թշնամական գործողութիւններու դիմելու վտանգաւոր հետեւանքներէն: «Յեղափոխական պահակագունդին լայնածաւալ հրթիռարձակումը հակադարձութիւն էր կարմիր գիծերը հատած Իսրայէլին ու կը հիմնուէր ՄԱԿ-ի ուխտին երկրորդ յօդուածին վրայ», նշուեցաւ Իրանի յայտարարութեան մէջ: Դիտել տալով, որ տեղի ունեցածը պատժիչ թեթեւագոյն գործողութիւնն էր, Թեհրան նշեց, որ թիրախաւորած է բացառաբար զինուորական կեդրոններ, խուսափելով տնտեսական կարեւոր կէտեր եւ ենթակառոյցներ հարուածելէ: «Այժմ զինուորական նոր գործողութիւն չկայ մեր ծրագրին վրայ», նշեց Իրան, սակայն զգուշացուց Իսրայէլը, որ յաջորդ ոտնձգութեան պարագային, հակադարձութիւնը տասնապատիկ աւելի ուժեղ պիտի ըլլայ:
Իսրայէլեան բանակի բանբերը Տանիէլ Հաղարի յայտնեց, որ վերջին զարգացումներուն լոյսին տակ, որոշուած է փոխել ներքին ապահովութեան քաղաքականութիւնը եւ վերաբանալ վարժարանները, որոնք երկու օր փակուած էին Իրանի յարձակումին սպառնալիքով:
Ամերիկեան զինուած ուժերու կեդրոնական հրամանատարութիւնը յայտարարեց, թէ Կիրակի առաւօտեան եւրոպական մարտանաւերուն աջակցութեամբ յաջողած է կործանել Իսրայէլի ուղղութեամբ Իրանէն ու Եմէնէն արձակուած անօդաչու 80 սարք եւ առնուազն վեց հեռահար հրթիռ: Ըստ յայտարարութեան, այս կը ներառէ 7 սարքեր, որոնք գետնի վրայ կործանուած են Եմէնի մէջ, ինչպէս նաեւ տակաւին չարձակուած հեռահար հրթիռ մը:
Իսկ Ֆրանսայի նախագահ Էմանուէլ Մաքոն Իրանը համարեց իսկական վտանգ մը եւ խոստացաւ Իսրայէլը համոզել, որ զերծ մնայ հակադարձութենէն, որ կրնայ աւելի սրել շրջանի լարուածութիւնը:
